الله الغني عن فلوسهم لأ نزيه يا عبدو

الله الغني عن فلوسهم يا عبد الله
ياراجل قول كلام غير ده
طبعاً كلكم عارفين إن المعلم عبد الله كمال
لأ مش بتاع المدبح
المعلم عبد الله رئيس تحرير روز اليوسف المجله والجريده اليوميه التي بدأ نزولها مع انتخابات الرئاسه وأثبتت فشلاً زريعاً منذ اليوم الأول
في مقاله الأخير في روزا
عنون الأسطي عبد الله مقاله بعنوان حلو وجميل وبرّاق وهو
الله الغني عن فلوسهم
والعنوان ممكن يكون وضح المضمون
أيوه بالظبط
هو بيتكلم زي العمده مصطفي بكري وأخواته دي غير كان وأخواتها
عن مؤتمر براغ إللي حضره جورج بوش وكان فيه سعد الدين إبراهيم
وعن توجه الحكومه الأمريكيه لأن تقتطع جزءً من المعونه كشرط في مقابل تقديم إصلاحات جوهريه في لسياسه المصريه والإفراج عن المعتقلين السياسيين وعلي رأسهم أيمن نور
المهم في المقال الفلته كعادة عبد الله كمال ماهو واد فلته والفلته يجيب الفلته
عبد الله كمال بتاع الحزب الوطني
إفتكر فجأه إن أمريكا لا حول الله يارب ضربت العراق
وموريتانيا والصومال
وإن عندها سجن في كوبا إسمه جوانتانامو
كل ده يا عبد الله علشان لجنة الإعتماد بالكونجرس تقدمت باقتراح لإقتطاع بتاع ميتين مليون دولار من المعونه كجزء مشروط في مقابل إصلاحات مطلوبه من النظام المصري
وكعادته العظيمه في التصدي لكل المحتالين والأفاقين رفض عبد الله كمال أن تتصدي أمريكا وتفرض شروطها
والله الغني عن فلوسهم
إيه يعني إنهم يقولوا إفرجوا عن مزور_ علي حد قوله_ علي إعتبار إن أيمن نور متهم فعلاً وأفرض إنه متهم لا هما ولا إحنا طلبنا الإفراج عن أيمن نور وتبرئته من الحكم الصادر ضده
كله بيطلب الإفراج عن أيمن نور بمقتضي حقه القانوني في الإفراج الصحي
وكده كده يا أسطي عبد الله مستقبل أيمن نور السياسي إدّمر
وتقدر تطمن إنت وإللي مشغلينك إنه خلاص مش هيقف في وش الدلع دي ابن الريس
بس احنا كلنا واقفين
ما علينا
عبد الله مع حفظ الألقاب طبعاً لأنه أسطي محترم في مطبخ النظام
قال كل إللي في نفسهة في المقال وما حدش دق له لأن الجورنال مش بيوزع أساساً غير الكام نسخه إللي بياخدوهم المحررين ودول حتي مجاناً
لكن المصيبه إن برنامج البيت بيتك وإللي بيتبني حمله جديده وغريبه ضد النظام الأمريكي والسياسه الأمريكيه جاب عبد الله وكأنه فتح فتح وكتب إللي ماكتبهوش هيكل في الستينيات
وبدأت المذيعه الألمعيه مني الشرقاوي وإللي بصراحه خساره فيها إسمها وإللي مش مصدقني يتفرج علي مني الشاذلي علي دريم وبلاش مني الحسيني علي دريم بردوا
المهم بدأت الحاجه مني بكلامها بإن المقال جميل والعنوان مذهل دي حتي كانت ناقصه تتكلم علي بونت الكتابه وعلي شكل الحروف والسطور تحت بعضيها
وأنا عن نفسي كنت فاكرها سمبوكسات علي رأي محمد صبحي
المهم بأه إن البرنامج لم يكن يخلو من الوجه الحلو المسمسم والمثقف العبقري والمتطلع الذي ليس له مثيل الدكاتره تامر أمين إبن الحاج أمين بسيوني وأخو الأستاذ علاء بسيوني
وابن محمود بركه بالتبني
وطبعاً محمود بركه منتج البرنامج بياخد التعليمات من الوزير علشان البرنامج يتعرض لأني ما أعتقدش إنه ملكي أكتر من الملك وبيتصرف من دماغه
وفي البرنامج إنجلي عُبَد وقال كل إللي قاله في المقال الفلته وكمان زود عليه حاجات جات علي الهوا أون إير يعني والقريحه الألمعيه مبدعه وشغاله في كل وقت
ولما يتصل شيخ طباخين الحكومه مصطفي بكري باعتبار انه بيشيل الوزر مرتين نره لإنه بيقول زي الحكومه ما هي عايزه ومره لأنه بيخدع الناس ويقول إنه معارض
لازم عبد الله يكسب مصطفي في جولة النفاق
فيروح داخل بقوه ويقولك في تحليل عبقري
إن الموضوع مش موضوع أيمن نور لكن لأن مصر رفضت طلبات أمريكيه تانيه لما قالولنا ابعتوا قوات العراق وانهم ديمقراطيه فاسده بتحتل وتضرب في البلاد والعباد وان النظام المصري وعلي راسه الرئيس مبارك بترفض سياساتهم الإمبرياليه
شوف يا أخي رغم إن سليمان عواد طلع وقت دخول القوات الأثيوبيه للصومال وقال إحنا بنتفهم الوضع
وردت كوندي وقالت ان الطرف المصري متعون وأبدي تفهم للوضع في الصومال وموريتانيا
شوف الرفض
مصطفي بكري لقي نفسه هايخسر الثقه الرئاسيه قدام عيل مفعص راح نازل بتقله
وهات يا تخبيط
وقالك ان أمريكا بتاعة الديمقراطيه ده كلام فارغ
ديمقراطية إيه أم ديمقراطيه
دول شالوا مدير قناة الحره علشان ذاع خطاب نصر الله
وشالوا مدير الأخبار في السي ان ان علشان قال الجيش الأمريكي بيقتل المدنيين العراقيين
طب الكلام ده كان فين
متشال لحد ما تاخد توجيهات بكتابته
وإلا افتكرته علي غفله كده علي الهوا
إدخل يا عبد الله هاتخسر ياد يخرب بيتك
يدخل عبد الله بإبتسامه ويعلن عن نفسه ويكشر عن أنيابه ويقول في ثقه لتامر أمين علي فكره أنا بكتب آراء أشد من كده بس أنا باراعي التليفزيون ومش عايز أسببله مشاكل
يعني الموضوع بيبان أهو وكله كلام محسوب وبالمسطره ولا حريه ولا حاجه ثم إيه الجرأه دي يا عبدو وهي فين أساساً ما حدش بيشوفها ليه
إلا تكون مصدّق ياد إنك كاتب صحفي وبتاع وإن ليك رأي حد بيسمعه
أيوه إنت ليك رأي إللي إتظلم ما بيظلمش ومش هاحرمك من رأيك بس بله وإشرب ميته ماحدش بيسمعك غير إللي مشغلينك
ثم الجرأه دي من عينة الكلام بتاع روزا
وإلا الكلام إللي بتقولوا مع عمرو عبد السميع نائب رئيس تحرير الأهرام في برنامج حالة حوار وأحد طباخي النظام الأساسيين
ورينا الجرأه يا سيدي
يروح داخل عبد الله ويقولك ان الحكومه الأمريكيه مابتمنش علينا وان المعونه دي حقنا بموجب اتفاقية كامب ديفيد
وإن في برامج واتفاقيات لتقليصها تمهيداً لإنتهائها
وهنا يحس بكري فيدخل بتقله قائلاً
ان العملاء أمثال سعد الين إبراهيم يستحقون وقفه جاده
وأنا مش عارف هو حاطط الراجل في دماغه ليه وإلا أسياده إللي حاطينه
ثم إن سعد الين إبراهيم شخصيه سياسيه محترمه لا يليق بمن يطرح نفسه كمعارض للنظام أن يتطاول عليها ببذاءات وقلة أدب
وبعدين ده راجل مثقف وأستاذ إجتماع في الجامعه الأمريكيه يا صحفي علي قده انتا وهو
ويطلق بكري قنيلته الكبري قبل انتهاء البرنامج
قائلاً
إن بوش هذا الأرعن الذي نجح في انتخابات مزوره لن يفرض كلمته علي النظام المصري
هنا يحس تامر أمين المبتسم طوال الحوار بالخطر
فيفشخ بقه بضحكه أكبر مقاطعاً مصطفي عنتر بأنه يتفق معه في الكثير مما قيل رغم إختلافه مع بعض التعبيرات
يعني الموضوع في النهايه ليس نقاشاً موضوعياً لكنه محاوله للضغط علي النظام الأمريكي عبر تعبئة الشعب المصري ضد سياساته ودون أن يتسبب ذلك في إغضاب النظام الأمريكي نفسه
يعني زي إخي عليه نفسي فيه
اللعبه طبعاً بايخه وواضحه ومفهومه وعيب تتعاملوا معاناة علي إننا كراسي فاضيه ولا كنب مستني أي حد يحط تقله عليه
وفي النهايه أطلب من الساده المدونين الزملاء
عدم الغضب من تغطيتي لبنامج البيت بيتك
لأنه لعلمي بتفاهة التليفزيون المصري وان مفيش حد منكم بيتفرج عليه فأنا عايز أقولكم المسرحيات إللي بيعملوها فيه
وأعتقد إن أنا الراسل الوحيد ليكم في التليفزيون المصري
وده مش حب فيه ولا في الي بيقولوه
لكن الصراحه
لأن أنا ما عنديش دش
يعني استحملوني لحد ما أقبض الجمعيه وأرحمكم من البيت بيتك
تمخّض مبارك فأنجب كيمو
نعلم جميعاً المثل القائل
تمخّض الجبل فولد فأراً
وهو يضرب فيمن يظن أنه عظيم الشأن ثم يأتي بفعل يناقد هذه الهيئه أو هذا الظن
وهذا ما إنطبق علي الرئيس مبارك
وجعلني أخالف العقل الجمعي الذي أنتج أمثالنا الشعبيه الرائعه وأغير المثل ليتطابق مع مقتضي الحاله
فالرئيس مبارك صاحب التسعه وسبعون عاماً يبدو أنه قد أصبح وبصفه نهائيه لا يحسن التصرف ولا يقدر الأمور حق قدرها
وطبعاً أنا لا أعترض لأن للسن أحكاماً لا يصبح بوسعنا أمامها إلا التسليم
وهو ما لو فعله الرئيس مبارك ستصبح المشكله هباءً منثورا
هذه الديباجه وهذا الموضوع كله بخصوص التعيينات الجديده في مجلس الشوري
والتي تمت في أربع وأربعين إسماً أصابهم التجديد النصفي بالإضافه إلي إسمين ماتا أثناء هذه الدوره
الرئيس مبارك الذي أتي لنا بهاني سرور في مجلس الشعب عن طريق التعيين
وبممدوح إسماعيل في الشوري
لم يحاول أن يكف عن لعبته المفضله في إصطناع الغباء والبلاهه أو لعلها ليست مجرد لعبه
ولننظر إلي تعيينات المحروس من العين إللي بيحكم بلد فيها 75 مليون
رغم الحرب الدائره بين الحرسين القديم والجديد في الحزب الوطني ووطنطن
فإن صفوت الشريف قد مر إلي المجلس لكن دون رجاله من الحرس القديم أو بتخفيض عددهم طبقاً لإرادة جيمي وهو ما دعاة الشريف إلي إقصاء رجال السياسات في مجلس الشوري من اللجان
الرئيس إللي بيحي يخربها ويتفرج أو بلاش نقول يخربها لأن خرابها علينا هو عمار عليه
أخرج 14 إسماً ممن أصابهم التجديد النصفي
والبقيه الباقيه
صفوت الشريف وأحمد العماوي وعيشه عبد الهادي
وعلي لطفي وحبيب العادلي واسماعيل سراج الدين ومحمد شوقي السيد ومصطفي كمال حلمي و مكرم محمد أحمد ويونان لبيب رزق وعلي الدين هلال وأحمد ماهر ومحمد عوض تاج الدين وسليمان متولي عاطف عبيد وزينب صقر وعبد الرحيم نافع وأحمد عبد الحليم ومحمد فريد خميس وفوزي فهمي عبد المنعم سعيد ويمن الحماقيورابح رتيب بسطا وأنور رسلان
وطبعاً زي ما إنتوا شايفين الأسماء وعارفين الوشوش الناس دي لا مؤاخذه من بتوع الموجه ومفيش حد فيهم حكيم زي ما بيقولواعلي المجلس
يعني لا هو مجلس حكماء ولا حاجه ومنين حبيب العادلي وصفوت الشريف ها يجيبوا الحكمه
وياريت سفه الرئيس وقف علي كده ده حتي الجداد إللي جابهم فيهم العبر ولو الواحد لاقاهم علي عربيه في سوق الخضار مش هايقلب فيهم ولو البياع حطهم له غلط هايروح يرميهم في الزباله وحتي مش هايدعي علي البياع
تخيل الرئيس المحترم المبارك جايب مين جداد
يا جدع دي حرقة دم ده الواحد يروح إسرائيل أحسن وإلا يشوفله بلد محترمه يعيش فيها
بقي محمد علي إبراهيم رئيس تحرير الجمهوريه العُجر وإلا الواد عبد الله كمال إللي قلمه بينقط حبر في حجر الرئيس دول حكماء
وإلا عندهم مخ من أساسه دا حتي ما عندهمش لحمة راس زي إللي عند البهايم
الرئيس ضعيف وعايز إللي يسنده ماشي كبير يا جماعه والسن له حكمه
عامل زي العيل الصغير وأي حد ممكن ياكل دماغه بكلمتين
وماله إللي يعرف ياكل ياكل
بيزور الإنتخابات علشان عقله موديه كده ومتهيأله إنه بالشوية المنافقين دول ها يقفل البلد ماشي بكره تتعدل
إنما المجلس يبقي إسمه مجلس الحكماء ويحط فيه أغبياء ده إللي ما يعديش دول حتي ممكن يعدوا حبيب العادلي وإللي معاه بالنباهه إللي زايده عندهم وبدل حبيب العادلي ما يطلع أمر إعتقال لمهدي عاكف وإلا محمد حبيب يطلعه لمبارك نفسه
العالم دي خطر
إزاي العاقل إللي بيحكم 75 مليون يجيب الناس دي ده حتي الكدبه مش متساويه صحيح أنا مؤمن بإن لكل فوله مسوّسه كيال أعور
لكن بردوا ده السوس باين منكل حته وإلا باين بيق الكيال مش أعور لأنه ضامن الزبون الأعور المدب إللي هايشتري منه محمد علي إبراهيم وعبد الله كمال وإللي زيهم بسوسهم وأهو السوس أرحم من القمح المسرطن
يالا يا واد يا عبد الله إحنا بنهاجمك وإنت بتزيد في النفاق وتعلي بس اليوم الموعود قريب وإنت عارف إيه إللي هايحصلك
شفت مسرحية محفوظ عبد الرحمن حفله علي الخازوق إنشاء الله هاتبقي إنت المدعو الوحيد فيها
أما محمد علي إبراهيم فده لا يستاهل الحفله ولا البتاع إللي معموله عليه وهاناخده يلم الهدوم
أما بقي البيج بوس الرئيس مبارك
فأنا عن نفسي مش عارف مصيره إيه وبصراحه حالته مشكله وتصعب ع الكافر
تخيل يا مؤمن إنت وهو بقالي ييجي شهرين في مباحثات جباره ومفاوضات قاتله مع مزبلة التاريخ علشان تفضيله حمام يقعد فيه بعد ما يخلع وهيا مش موافقه
قال إيه خايفه من وصمة العار