باعلناها توبه عن ذنوبي
وعنك إنتي يا أحلي ذنب
مش جريمتك إنك أمي
ومش جريمتي إني باحب
هيا تهمه بيلزقوها
فوق قفاكي وفوق قفايا
مش باهيّص وإلا أجعجع
وإلا أزور في الحكايه
لو سألتي يا مصر نفسك
راح تلاقي التهمه كدب
واليالي إللي إنتي فيها
والآهات إللي تقوليها
والمذله ساكنه فيكي
والمهانه بتبلعيها
إحنا يا صاحبة وجودي
في الزمان ده كبيرنا كلب
إحنا نسكت وإحنا نسمع
لو نجوع بالضرب نشبع
لو نروح للحق نرجع
أهل باطل وأهل كدب
إحنا يا صاحبة وجودي
في الزملن ده كبيرنا كلب
لو نعاند أو نقاوح
كف بيوقف مراوح
قلب كان في الهم طايح
وأما صارح وأما ناطح
كبّوا دم القلب كبّ
إحنا يا صاحبة وجودي
في الزمان ده كبيرنا كلب
إحنا ع المسرح حاجات
ديكورات وإكسسوارات
إللي حي كما إللي مات
ونبات في شرق نقوم في غرب
كومبارس إحنا يادوب وبس
همّا نَصّ أما إحنا هُس
هما واحد وإحنا نُص
مُخرِجين علي مُخرَجين
مسرح لعين وبطوله نصب
إحنا يا صاحبة وجودي
في الزمان ده كبيرنا كلب
إحنا ع السلم وقوف
لم نمل من الوقوف
بيرصوا فينا ألوف صفوف
ويبعترونا ف كل جنب
لعبه هاديه بيلعبوها
يدوبوها يلولبوها
يعذبوها يصبروها
يقربوها يغربوها
يشربوها الهم شرب
إحنا يا صاحبة وجودي
في الزمان ده كبيرنا كلب
لو نادينا يادوب يردوا
بالفساد والسرقه بردوا
كل شطارتهم يعدوا
حرب فينا بعد حرب
شدوا منا الحلم شدوا
هدوا في إللي الويل ما هدوا
فوق ملاحم شوقنا عدّوا
وإستعدّوا ع الأمل لمّا إكتمل
تشريد ونهب
إحنا يا صاحبة وجودي
في الزمان ده كبيرنا كلب
الاشتراك في:
تعليقات الرسالة (Atom)
ليست هناك تعليقات:
إرسال تعليق