حلمت حلم حلو خير اللهم إجعله خير

وقد تنازل سيادته عن الكرسي لسمو ولي العهد جمال مبارك طواعية ودون إبداء أي إعتراض

حلمت إمبارح خير اللهم إجعله خير إن الثوره قامت

لأ طبعاً مش باخرّف ما انا عارف إنها قامت بقالها 55 سنه بس أنا قصدي ثورة 2007 حلمت لحسن الحظ إن الثوره المباركه مش علي إسم مبارك ده من البركه قامت من بين صفوف الشعب الكادح والبلوريتاريا الرثّه ومهيّاش ثورة جيش علشان المأساه ماتتكررش تاني شوفتوا أنا حريص في أحلامي إزاي المهم إن الثوره الشعبيه المباركه وجهت إنذارا رسميا للسيد الرئيس محمد حسنس مبارك وشوف يا أخي جمال الشعب المصري هو خوزقهم علي مدي 26 سنه وهما لمل قدروا مارضيوش يخوزقوه ويابخت من قدر وعفا بس أنا زعلان مكن الشعب المصري لأنهم ما اتحلوش بروح العفو مع باقي رموز النظام يعني استلموا الباشا حبيب العادلي ودكتور كلين بتاع الحكومه الذكيه وممدوح مرعي ومنصور أوبل وابن محيي الدين إللي باع تاريخ إعمامه وبقية الطقم علشان ما أغلبش من العدد في ميدان عام وهات يا خوازيق لمل كفروا عن كل إللي عملوه في اللشعب المصري المهم نرجع لرأس النظام السيد الرئيس فقد وجّه له الثوّار بياناً رسمياً يطالبه بالتنحي والتنازل عن العرش لسمو ولي العهد جمال مبارك المعظم وطبعا هو وافق علشان التوريث جاله علي الطباطيب وأفتكر الشعب ساذج وعبيط +_ معذور مايعرفش الشعب المصري وإللي في نياته ماهو هيعرفه منين وهو بيتعامل معاه بفوقيه وساديه وكأنه مبعوث العنايه الإلهيه لإنقاذ الشعب البائس الجاهل من الإنقراض_ المهم أصدر سيادته بياناً يعلن فيه الموافقه علي الطلب والتنازل عن العرش وكذلبلك الموافقه علي بقية الطلبات الأخري آه نسيت أقولكم إن من ضمن طلبات الثوّار إنه ياخد المدام وياخد علاء وعياله ويرحل لأي بلد تقبل تستضيفه الكام ساعه إللي باقيين من عمره .

وقد طلب سيادته أن يسمح له بطائرته الخاصه ليسافر بها وقد وافق القاده علي المطلب والقاده طبعاً همّا الشعب كله ما هي ثورة بلوريتاريا وكله زي بعضه وماحدش أحسن من حد وبعدين إحنا اتضحك علينا كتير والمفروض إنه لا يلدغ المؤمن من جحر مرتين وإحنا اتلدغنا كتير المهم جرت مراسم تنصيب ولي العهد وسافر السيد الرئيس السابق علي طائرته الخاصه ظهر اليوم قاصداً_ أرض الله لخلق الله مفيش بلد لحد دلوقتي راضيه تستضيفه ولا تنزله ترانزيت في أرضها

وقد حلف الرئيس الصغير يمين الولاء بعد ظهر اليوم وفي نفس التوقيت الذي وصل فيه خبر الحادث الأليم الذي حدث لعائلته بسقوط طائرتهم قبالة الشواطئ الأمريكيه أثناء المحاوله الفاشله للتذلل لبوش بالسماح لهم بالإقامه علي الأراضي التي خدموها كثيراً بوقتهم وجهدهم وأموال المصريين ولكن للأسف فقد نفد وقود الطائره أثناء إنعقاد جلسة مجلس النواب الأمرسيكي الذي كان يبحث طلب بوش بالسماح له بإستضافتهم في مزرعته الخاصه وعلي نفقته وليس نفقة دافع الضرائب الأمريكي

وفي تطورات الصعيد المحلي فقد قام الثوريون الشعبيون بعزل الرئيس الجديد وأدعوه فرع دار الأورمان لرعاية الأيتام بمصر البجديده حتي لا يحرموه من مرارة حرقة الدم كلما رأي الرؤساء الجدد واحداً يلو الأخر وهم يركبون سيارته الرسميه التي إشتراها له الوالد بمناسبة نجاحه الفظيع في إتمام عمليت بيع ديون مصر بشكل حقق الرضا الكامل للحلفاء الإستراتيجيين

وفي النهايه إنها إرادة الشعب المصري الجبار

أنا زعلت لما أنمي نادت عليا وصحتني فقمت لقيت صورة الرئيس السابق قصدي الحالي في نشرة التاسعه

اللهم إكشف الغمه