عاشت مصر حره مستقله
عاشت مصر بنماذجها البشريه التي تثير الشفقه والغثيان في آن واحد
نماذج تجدها جالسه مجعوصه وعلي فخر الدين أقطاي في زمانه وقاعده تنظر وكأنها فتحت عكا
مفيش مشكله
اللهم لا إعتراض
اللهم لا أسألك رد القضاء ولكن أسألك اللطف فيه
إللي عايز يتفلسف أهلاً
وإللي عايز يتكلم أهلين
لكن القاعده الأولي وأعتقد إنها في المدونات تحديداً أكثر
إنك تسمع أكتر ما تتكلم
لأننا مش في القناه الأولي الأرضيه إللي فيها الفرجه إجباري
إللي بيكتب موضوع لازم يكون عارف إنه لازم يرد جميل إللي هايعصر علي نفسه لامونه ويقراه
ولما يرد يقرا هو كمان
ماحدش فينا توماس فريدمان ولا صامويل هنتنجتون
إحنا بنحاول نتناقش مع بعض ما إحناش في مدرسه
وإللي قاريله كلمتين معتقد إنه جاب الديب من ديله
فيها إيه لو يتعامل علي أساس إنه بيراجع الكلمتين إللي هو عرفهم مع الناس
لأني ما أعتقدش إن إصحاب الكلام ده متمسكين بيه بالدرجه دي
ليه الناس بتزعل لما واحد بيطلع بكلام من برا الدايره إللي هما دايرين فيها
ما حدش فينا بيعمل فتح في عالم الكتابه والمعرفه
وتفرغنا لخلافات شخصيه وقضايا فرعيه أعتقد إنه مش وظيفة التدوين علي الأقل في العالم العربي وفي الوقت الراهن
خاصة وإن إحنا إنحرفنا بالتدوين علي غير الأعراف الخاصه بالبيئات التي نشأ فيها
وجعلناه أداه سياسيه إجتماعيه للنقد ومحاولة التغيير مش يوميات وكل واحده فاضيه تقعد تحكي عن طعم صينية البطاطس إللي عملتها وراح فيها كام صباع إصحابهم نسيوهم من حلاوة الصينيه
ولا كل واحد فاضي يقعد يحكي عن مغامراته مع جماعته
سواء الجماعه دي جماعه وإلا جيرل فريند
الداء ده مستشري في مصر من زمان
وعلاجه هايبقي صعب بلا شك
لكن إستسلامنا له وتعاملنا معاه كأمر واقع هايزيد الطين بله
بوستات بتتكتب ليل نهار
تنتقد النظام
والسياسه الشموليه والصوت الواحد والإعلام الموجه والتعليم الموجه وكل حاجه موجهه حتي مترو الأنفاق
وإحنا أكتر ناس بنمارس ده
أنا مش بانكر مسئوليتي لأن كلنا مشتركين في الموضوع ده
وكلنا بنحجم نفسنا علي هوي النظام وبنديله هدنه بلوشي ما يستحقهاش
مش دور التدوين التضامن مع فلان المعتقل رغم إن ده دور مهم وشريف
لكن محاربة الهالات الإعلاميه تفرض العمل مع الهامش
يعني خرجنا علي رباطية السياسه وعملنا رباطية مدونين
شله بتهني بعضها وتتضامن مع بعضها وتاخد مواقف بعضها صح أو غلط
وبقينا نظام إفتراضي موازي للنظام الرسمي
بقينا فرع الحزب الوثني علي شبكة المعلومات الدوليه
أعتقد إننا لازم نفوق ونسيبنا من المهاترات إللي بدأت تستولي علي جزء كبير من المدونين يتساوي في هذا السوي منهم والمعقد والمريض نفسياً والمراهق فكرياً وثقافياً
أنا مش شايف مشكله في إننا نكون المساحه الأكثر رحابه في مجتمع المتحدثين بالعربيه
الناس كل يوم تخترعلنا تابو جديد غير التابوهات إللي مطلعه عين أهخلنا وهربانين منها للنت علي إعتبار إنه من غير تابوهات طلع بتابو منه فيه
أنا أشد التابو
وهو يلسعني
هانفضللا كده مجتمع مصاصه
مجتمع بيتلم بصرخه ويتفض بعصايه حتي علي النت
المدونات بتزيد وبنستبشر خير والهطل بيزيد مع زيادتها
شتيمه وقلة أدب وجهل بأدبيات الحوار
تقريباً نظرية إننا متأخرين عن أوربا 400 سنه حقيقيه
برتراند راسل قال من زمااااااااااااان
أنا مختلف معك ولكني علي إستعداد أن أدفع حياتي لتتمكن من التعبير عن رأيك
أنا عن نفسي بقيت خايف أعبر عن رأيي بصراحه لا ألاقي إيد طالعه منةشاشة الجهاز علي عيني وأنا نظري ضعيف أساساً
أنا متأكد إن الشباب العربي شباب واعي ومثقف وما يقلش عن شباب أوربا حاجه
لكن العيب إننا دايماً بنقبل برضانا أو بيتفرض علينا إننا نحارب حرب غيرنا
وندافع من غير ما نفكر
أشبه حاجه بحالتنا أسطورة سيزيف
كان فيها إيه لو ساب أم الصخره وبطل يشيلها ويطلع بيها
كان هايمكوت وإلا يتنيل
بس هاتبقي الإراده إنتصرت
كل واحد له رأي
وله أديولوجيه
وله دين
مسلم مسيحي بوذي كافر
يساري يميني زفت علي عنيه
أنا قابل أي حد بأي شكل وأكيد كل واحد مننا لو فكر شويه هايقبل
ليه بقي مش بنفكر
ده ربنا قال
ولو شاء الله لجعلكم أمة واحدة
يعني الإختلاف مش مسأله ضروريه وحيويه والكلام الحلو ده كله
لأ ده مسأله قدريه
الموضوع مفتوح وقماشته واسعه
وتقريباً كلام عادي مفيهوش جديد
أنا مش كاتبهخ علشان أشغلكم أو أضيع وقتكم
بس ده تنفيس شخصي وكلام في حلم باتمناه لمصر والعرب والمدونين
جايز أكون بانفّس عن نفسي
وجايز باكون باذكّر نفسي
وجايز باكون باذكّركم
شوفوا الكلام تافه ومالوش لازمه
إنتوا حرين شوفوه زي ما إنتوا عايزين
لكن شوفوا المستقبل جنب الكلام ده
بصوا شويه لمصر
لا بشتيمه ولا بتحيز ولا بكلام مش محترم هانبقي حاجه
ولا حد هايبقي ماركيز وإلا كويلو علي النت
نفوق شويه يا جماعه
ياريت
الاشتراك في:
تعليقات الرسالة (Atom)
ليست هناك تعليقات:
إرسال تعليق