هما دول يا مصر إللي سانده ضهرك عليهم

تابعت الجدل الذي أثير في الفتره الماضيه بخصوص موضوع زغلول النجار والتعليقات التي أتت علي الموضوع من كثيرين تكلم منهم من تكلم بأصول وإشتراطات الكلام والحوار الراقي
وخرج منهم من خرج
وانا بشكل شخصي لا يعنيني من خرج عن آداب الحوار في حد ذاته لأن هذه النماذج تملأ مصر وتنغص علينا حياتنا
وتحدياً إستفزني الأستاذ المسمي نفسه أسد الدين
وناقص يطلعلنا من شاشة الجهاز بسيف
الأخ المبجل المحترم كان لي معه سابقه وقال لي في رده علي موضوع لي تحدثت فيه عن البخاري أن حذاء البخاري أفضل مني
وكتب حذاء بحرف الزين
وبغض النظر عن البخاري وحذائه الذي أعتقد انه لم يكن في وقتهم أحذيه وإنما قباقيب خشب تليق برأس الأخ أسد الدين
طبعاً النماذج دي أغلبنا بيعاني منها ومطلعه عينا في البيت والشارع
وهو أو غيره إتربوا علي كده
مش قصدي غلط لا سمح الله
بس إسلوب التربيه ومناهج التعليم في مصر لا تنتج بشراً أسوياء يستطيعون إقامة حوار محترم مثمر بنّاء
المشكله بقي إنه بجانب عدم اللياقه والخروج علي الذوق العام والأعراف
فتلاقي كمان جهل واضح وإستنتاجات من الهوا وتحميلف لكلمات لما لا تحتمله في مختار الصحاح أو عند مشايخ مجمع الخالدين
بداية من إن الإستاذ يشوف إن معني إن جيفارا يتبع الرسول والله في قائمة الإستشهاد أن هذا يعني تفضيله عليهم
ثم إستنتاجه من الكلام بشكل غير منهجي أن هناك أيديولوجيا او توجه بل إنه يستنتج التوجه الأساسي بأن نواره يساريه او ماشابه متخلياً عن الموضوع الأساسي الذي يطفح عبقريته فيه ومنتقلاً لساحات شخصيه وتأويلات بالظن
ويتكلم الأسد المفوه بعبقريه واضحه لا مراء فيها عن اليساريه والشيوعيه بما يوحي بل يؤكد بشكل واضح أن اليساريه لا تعني له سوني زميله الأعسر في التخته أيام المدرسه الإبتدائيه والذي كان المدرسون يضر بونه لأنه يأكل بيده اليسري
ويعلن في فخر أن ماركس اليهودي
أيوه الراجل الوحش إللي عمل الشيوعيه
وتقريباً الأخ ما يعرفش إن ماركس تلميذ هيجل وإن تقريباً آراء ماركس هي تطوير لآراء أستاذه ومبدأ الإشتراكيه هو هيجل
وكمان ما يعرفش إن ماركس وضع أسس نظريه لتحقيق معادلته الحياتيه دون وضع خطه واضحه لتطبيقها وأن هذا لا يتعارض مع أي دين علي وجه الأرض فالموضوع يحتاج فقط لعقول مفكره من عينات عكس عينة عقلية الأخ الأسد إبن الأسده
وهو تقريباً مايعرفش لأن الجرايد ما بتوصلش بلدهم
ده كويس إنه عرف إسم جيفارا علشان يكتبه9 صح وهو بيشتمه
وما يعرفش عنه حاجه
وجيفارا إللي بيشتموه بجهل ده أشرف من أساتذتهم الجهاديين من عينة أيمن الظواهري أو أسامه بن لادن أو أبو مصعب الزرقاوي
والله أشرف منهم بكتير
علي الأقل ما كانش بيدبح الرهاين زي الحيوانات ويصورهو ويوزع الصور وينشرها علي النت
والأخ أسد طبعاً هايشغل العبقريه ويقولي لو في أيامه موبايلات بكاميرا كان عملها
إنما بقي حظه كده
والأخ ما يعرفش إن جيفارا ده دفع عمره فدا قضيه هو مقتنع بيها
وإنه كان شريك كاسترو في ثورة كوبا وإتعين وزير لكن إستقال وراح شارك في ثورة الكونغو ثم بوليفيا
وتشوف بقي الإخوان تلاقي حد زي الشيخ الباقوري رحمه الله
وأنا لا أطعن فيه لكن باستشهد
باع الإخوان وقضيتهم وخلافهم مع عبدالناصر أول ما إتعرض عليه يبقي وزير أوقاف
الأخ أسد بردوا بيقول لكل اليساريين والشيوعيين إن الكلام بتاعهم كلام فاضي
وإن لينين وستالين والعالم الوحشه دول راحت عليهم
ما يعرفش بردوا علشان الجرايد ما بتوصلش إن أغلب اليساريين بل تقريباً كلهم مختلفين مع لينين وستالين بدرجات متفاوته
وإن الإشتراكيه مش هيا إللي إطبقت في الإتحاد السوفيتي
لأن الجميع مختلف معاه في التطبيق وإن كانت النظريه واحده
لأن بردوا في فرق بين الإشتراكيه ورأسمالية الدوله
عموماً في كلام كتير جاي في الموضوع ده
ومش عايز أطول
بس نفسي إن كل المدونين يحسوا بالمشكله الكبيره إللي مصر فيها ويسيبوهم من التهريج الفاضي وإللي عنده كلمه مفيده تنفع وتصحح مسار يقولها وإللي ما عندوش يسكت هو مش كلام ومخنظره ومدونه زي قلتهاوالسلام والإسم مدونين
يا جماعه مصر مخش هاتتقدم بينا علي رأي الحزب الوطني
يا أخ أسد يا حبيبي
يا صديقي
يا محترم
إقرا والنبي يا بابا
وبعدين فرصه ذهبيه وإنت حظك حلو علشان إنت إبن حلال
مكتبة الأسره عامله شغل حلو والكتاب بإتنين جنيه بس
وإنتي يا نواره مش أي حد تدخلي معاه في حوار لا ها يودي ولا هايجيب
يا جماعه نفسي نحس شويه ونخلينا أد المسئوليه وأد ما إحنا ف عين النظام نكون بجد


وفي النهايه أنا متغاظ وشايط وعلشان كده في كذا حاجه عدت في كلامي فيها إساءه
باعتذر عنها للجميع
آسف يا أسد آسف يانواره
نفسي نفعل مبدأ شرف مهني للمدونين
وإللي يعديه يتعمل له إيجنور
تجاهل يعني
علشان نفوق من الهطل بقي