بلدنا فيها جمال
وجمالها فاق حسني
أنا اللي كنت مثال
في جمال وف حسني
فيها سرور وكمال
وتلال محبه ومال
ماتلاقي فيها محال
ولا لص مش وطني
بلدنا فيها جمال وجمالها فاق حسني
بلدنا جنه بدون بيبان
مفتوحه حتي للشيطان
ماترد ضيفها لو جعان
تدبح عيالها وتطعمه
تديله خيرها وخير ترابها
وتعفي عنه لو خربها
ضيفنا حتي ولو نهبها
بأي عين هنكلمه
كرم الضيافه يلزمه
مبعوث رفيع ونحزّمه
يروح لضيفنا ويعزمه
علي كيف هواه يهدم ويبني
بلدنا فيها جمال وجمالها فاق حسني
فيها حرّ وزمهرير
فيها ألف وجيه وزير
والصغّير والكبير
طراطير ولازم ليه تغني
فيها فكر رشيد ماددلي
ألف إيد في الليل تقيد لي
وإللي راح بكرامتي عادلي
وجه قعدلي ف عيني نني
بلدنا فيها جمال وجمالها فاق حسني
فيها كنز (غالي) مالي منه ايد
فيها (عزّ) يهز لو حتي الحديد
فيها مَزّ بوِزّ وبدم وصديد
بس ليه ع الطيبين بس التجني
فيها الحمار مابقاش يجر كارو ليه
كده فجأه صار بيجر ماركة شيفروليه
راحت عليك يا قطر ولّع باللي فيه
عدوك المغرور (منصور) وأقوي مني
بلدنا فيها جمال وجمالها فاق حسني
فيها عقل (نظيف) جلبلي
شرق غرب بحري قبلي
صحه زي وعل جبلي
ثقافه نورها زاد حرقني
فيها شيخ شيّخ صفوفي
طنطاوي كان أو كان منوفي
أهو جيش بيصنع فيلمنوفي
بطوله زايفه فضحها ظني
بلدنا فيها جمال وجمالها فاق حسني
فيها مجد بتاع غناوي
فيها رقص علي القهاوي
هزّ وسط وهز مبدأ
في المكاسب والبلاوي
فيها ماللي تحب تسمع
أو تشوف لو كنت غاوي
سيرك خاوي وفيه أبالسه
بس صاحب السيرك حاوي
ناوي
ناوي حتي ولو ماناوي
الحقيقه أنا ليها راوي
هقولها صبح وف العشاوي
حقيقه فعلاً غصب عني
دي بلدنا فيها جمال
وجمالها فــــــــــــــاااااااااااااااااااااق حسني
الاشتراك في:
تعليقات الرسالة (Atom)
هناك تعليق واحد:
ما عجبني كلامك
إرسال تعليق