العالم ما بقيتش تصدّق
إن الصعب ساعات يتحقق
وإن التايه له يوم يرجع
والكدّاب ها يخاف وها يصدق
والعالم ما بقيتش تصدّق
يارسول الله طمِّن قلبك
دول كدِّبوا غيرك من قبلك
لكن ربك فيهم نصرك
ونجومك باتت تلألأ
والعالم ما بقيتش تصدّق
صدِّيق يا صديق إمضي ف حربك
بإسامه ومن غيره هاتربك
لو نبي مزعوم أو جيش مشرك
مش قوّه ده حق بيتحقق
والعالم ما بقيتش تصدّق
يا فاروق القدس بتفتحلك
أبوابها تخطّيها برجلك
والأقصي بيتشوّق فرضك
مع ضيّ الشمس إللي بتشرق
والعالم ما بقيتش تصدّق
يا جِمال عثمان وقت الضيقه
يامراكب في البحر طليقه
كفِّنا معقوده علي حقيقه
مجدنا م المغرب للمشرق
والعالم ما بقيتش تصدّق
يا أبو الحسنين سيفك حكمه
هايخرَّج نجفك م الضلمه
ماتقولش خوارج ومعاويه
ماتسيبش الإسلام يتفرّق
والعالم ما بقيتش تصدّق
يا صلاح الدين خدنا وعدّي
مافيناش ولا عربي ولا كردي
في ترابها جدودك مع جدّي
في سماها سنينا بتتزوّق
والعالم ما بقيتش تصدّق
يا معز لدين اللله غيتنا
يا سيوف الشيعه يا سنتنا
ده الأزهر بيساع لمّتنا
والكعبه عشانّا بتتزوق
والعالم ما بقيتش تصدّق
يا قطز مملوك الناس سيدهم
وتتارهم علي إيدنا عبيدهم
والله يقوينا ونبعدهم
وعنادهم في بحورنا هايغرق
والعالم ما بقيتش تصدّق
إن الصعب ساعات يتحقّق
وإن التايه له يوم يرجع
والكدّاب هايخاف وها يصدق
والعالم ما بقيتش تصدّق
الاشتراك في:
تعليقات الرسالة (Atom)
ليست هناك تعليقات:
إرسال تعليق