عيدٌ بأية حالٍ عُدتَ يا عيدُ

عيدٌ بأيّةِ حالٍ عُدّتَ يا عيدُ بما مضي أمْ لأمرٍ فيكَ تجديدُ



رحم الله المتنبي
وإلا بللاش المتنبي دي أحسن حد من إخوانا بتوع الإخوان يزعل ويتهمني إني با أتبع نبي تاني
يبقي
رحم الله أبو الطيب أحمد إبن الحسين المتنبي بردوا
أنا خدتها في المدرسه كده ومش قادر أنساها
المهم
الراجل ده كان عبقري
والأول ببساطه هو واحد شاعر
إتولد سنة 915 ميلاديه
مات سنة 965 ميلاديه
يعني مات وهو عنده 50 سنه رغم الصيت والسمعه الحلوه دي
المتنبي قال من أكتر من ألف سنه البيت إللي أنا بدأت بيه البوست ده
تخيل اللمتنبي من ألف سنه بيسأل عن جديد
وإحنا جتتنا تنحت دلوقتي وبقينا لا عايزين جديد ولا زفت
لأ وكمان متنازلين عن القديم
وفعلاً يا أخي لازمخ نكون زي اللمتنبي
يعني أنا عايز أحط كشف حساب بسيط كده للعيد
ويزعل وإلا يتفلق وإنشاله عنه ما جه تاني
ماهو يا يجيب معاه جديد يا ميجيش أحسن هو إحنا قليلين علشان يجيلنا بالقديم والمقطع وإللي طالع عينه
يالا كده نحاسب العيد

العيدإللي فات جه ومبارك لسه عايش
ومبارك دلوقتي لسه عايش بردوا مفيش جديد

العيد إللي فات جه وجمال رئيس لجنة السياسات
ولسه جمال رئيس لجنة السياسات مفيش جديد

العيد إللي فات جه ونظيف رئيس وزراء وعاه محيي الدين وشيفروليه والجبله وأباظه
ولسه9 هما بردوا زي ما هما مفيش جديد

العيد إللي فات جه والبطاله 12% و
لسه البطاله بردوا 12% مفيش جديد

العيد إللي فات جه ومعدل الإدخار 18% و
لسه معدّل الإدخار 18% مفيش جديد

العيد إللي فات جه وأنا قاعد في بيتنا
ولسه أنا قاعد في بيتنا مفيش جديد

العيد إللي فات جه وأحمد عز محتكر الحديد والبلد والحزب ومجلس الشعب
ولسه بردوا محتكرهم مفيش جديد

العيد إللي فات جه والناس طاله عين أمهم في إقسام الشرطه
ولسه طالع عين أمهم بردوا مفيش جديد

العيد إللي فات جه وإللي بياخد ميتين جنيه وإلا تلتميه مش مقضيينه
والعيد ده جه وبردوا هما هما القرشين ومش مقضيينه مفيش جديد


لو حبينا نجامل العيد ونطلعله حاجه جديده
وعلشان تعرفوا إني عالرف وما حدش يتفلحس
العيد إللي فات جه والمكرونه بـ 2جنيه ونص
والعيد ده جه والمكرونه بتلاته ونص

العيد إللي فات جه ووالسما زرقا
والعيد ده جه والسما انا عن نفسي مش عارفلها لون
العيد\ إللي فات جه والدنيا بمبي شويه
العيد ده جه والدنيا سودا ومأندله ومنيله بستين نيله
أنا عن نفسي أع8تقد في حكمه رائعه تقول
الأسوأ لم يأت بعد
لكن بردوا أعتقد إن من حقي وحقكوا نقوا


عيدُ بأيةِ حالٍ عُدّت يا عيدُ
وإلا إيه