طب بيبنوا ليه أما هما بيبيعوا

طبعاً نظام الخصخصه ده مش هنظلم فيه دكتور كلين لأنه بدأمن قبل ما ييجي لكن هو تفاقم أيامه بفضل إبن محيي الدين وطبعاً الصفقات المشبوهه لسه نارها مابردتش ومش أولها صفقة موبينيل أيا الجنزوري ولا آخرها صفقة عمر أفندي إللي إتباع بنص تمنه ولا صفقة بنك بنك إسكندريه إللي إتصرف عليه أربعه مليار كتجديدات وتسديد ديون وإتباع بتمانيه رغم إنه كان محقق أرباح 2 مليار في آخر سنتين يعني إتباع بشغل أربع سنين وإللي إشتروه تقريباً جابوا تمنه من الأصول إللي بيبعوها وبص بس علي إعلانات البيع إللي في الجرايد الحكوميه ده غير إنهم وفروا نص العماله تقريباً لكن كل ده ما استفزنيش أد الخبر الجديد إللي قريته وبيقول إن الحكومه بتنشئ مصنع حديد يتبع شركة النوباريه لتكرير السكر باستثمارات تفوق المليار جنيه وسيتولي إدارته مختار خطاب وزير قطاع الأعمال السابق طيب أما هما بيبيعوا طيب بيبنوا ليه وإلا مادام عايزين يبنوا بيبيعوا ليه الموضوع ده فكرني بصفقة موبينيل ودي شبكة المحمول إللي نفذتها الشركه المصريه وقبل التشغيل باعتها رغن إن سوق المحمول كان سوق واعد في الفتره دي وبيبشر بأرباح كويسه وده مايبانش منه للي بيفكر غير إن الحكومه بالإضافه إلا لتبديد تطوعت بتحمل تكاليف المخاطره عن رجالا الاعمال يعني يبنوا المصنع من دول ويستنوا عليه أما يعدي مرحلة الخطر ويتأكدوا من نجاحه وبعد كده يبيعوه للحبايب ومش بعيد يتباع لمختار خطاب نفسه بما إنه هيبقي أقدر واحد علي إدارته بسبب الخبره إللي إكتسبها من فترة إدارته تحت يد الحكومه يعني نصيبه من الكعكه يعملولوا مصنع ويستنوا عليه أما ينجح وبعدين يبيعوهولوا بأقل من تكلفة الإنشاء وطبعاً ده كله باين منه اللعب بين الحكومه والمستثمرين يعني مش بعيد يكون حد من حكومة نظيف عامل المصنع ده تمهيدا لشرائه بعد خروجه من الحكومه وبالذات رشيد بتاع المواد الغذائيه ولعبة تمرير المصالح والمعلومات دي مش غريبه علينا وكله فاكر صفقة الأسهم بتاعة المصريه إللي إشتراها نجيب ساويرس وباعها في أقل من أسبوع محققأً مئات الملايينمن الأرباح وكمان المعلومات إللي إتمررت من هيئة سوقسوء المال لأحمد عز في يوم الثلاثاء الأسود في البورصه وإللي كسب فيه مليار جنيه في يوم واحد من أموال صغار المستثمرين والعالم إلللاي مقضيينها بجنيهات قليله

طبعاً كل إللي أنا بقوله ده مش جديد والكل عارفه والفساد وصل للركب بس الغريب في الموضوع إن مبارك عارف يعني بيحمي وبيتستر علي الفساد والنقطه دي أنا قاصدها لأن كل رجالته هيردوا في صوت واحد لأمش عارف

فأنا هارد عليهم

طيب ويحكم بلد مش عارف إللي بيحصل فيها ليه

ده أصغر تاجر خضار في قبلي عارف إللي بيحصل في العبور والأسعار إللي بيتباع بيها إنتاجه يا إما ماينفعش يبقي تاجر وأمين علي فلوس ناس

هيبقي مبارك مش عارف السعر إللي بتتباع بيه مصر

طب إزاي نستأمنه علي فلوسنا ومستقبلنا ومستقبل ولادنا

هه؟