الحب بين الجبر والهندسه قصدي الإختيار

من زمان وإحنا متربيين علي إن الحب ده زي البرد بيدخل الجسم من غير ما حد يحس بيه وإنه قدر زيه زي الموت وإن كيوبيد واقف يا عيني متذنب ومستني كل إتنين من نصيب بعض علشان يطخطخ في قلوبهم سهام الحب والذي منه وكمان الأساطير شغاله عندك الأساطير اليونانيه بتقول إن عند بدء الخليقه كان كل قلبين مع بعض حاجه واحده لكنهم إتقسموا زي التفاحه نصين وإن كل نص داير في الدنيا يدور علي نصه التاني وطبعا مفيش نص بيركب علي نص غير إللي يخصه
يعني كده كده يا حبيبي مالكش غير مره واحده وفرصه وحيده للحب
ولو النص بتاعك نسيوه برا التلاجه وإلا الكهربا إتقطعت
يبقي عاتقضي حياتك عريان وقلبك مفتوح للدبان والناموس

طبعا الحقيقه غير كده خالص يعني الكلام اللي فات ده بيلغي العقل خالص في الموضوع ورغم إني من أنصار الأديب الكبير أنيس منصور لما قال الحب بالعقل يفسد الحب والعقل معاً إلا إن الحقيقه بتقول إن العقل موجود كما إن بسبب إننا مش عارفين الحب الحقيقي فين وبييجي إيمتي ده بيخلينا نتوه عنه وفيه ناس كتير بتعيش وتموت ماتقابلش الحب الحقيقي لكن بتحب وبترتبط وبتعيش حياتها عادي يعني
يعني روميو كان محظوظ لما لقي جوليت وقيس كان محظوظ بليلي رغم النهايه المأساويه
إلا إنه لقي نصه التاني
لكن عندك ناس كتير تانيه أنا مثلاً واحد منهم حفيانين علي نصنا التاني
ومش لاقيينه لدرجة إني إضطريت أشتري إتنين كيلو تفاح أمريكاني من أبو إتناشر جتيه يمكن يطلع نصي التاني فيهم
لكن روحت لقيت الجناعه في البيت كالوهم وضاعت عليا فرصة الحب إللي كنت عشمان فيها
وطبقاً للكلام الجد إاللي قلته قبل الشوية التهريج دول بخصوص إن إللي مش بيلاقي نصه التاني وحبه الحقيقي بيعيش ويتأقلم ويقضي حياته وخلاص ومش ضروري تفاح

إذن العقل موجود في الحب وكمان الحب مش قدر مطلق مفيهوش إختيار بدليل إنك ممكن ترتبط بحد وتسيبه وترتبط بغيره وتسيبه يعني موضوع القلب يحب مره مايحبش مرتين بتاع أغنية شاديه ده مش مظبوط وطول ما القلب بيدق فهو بيحب ويسيب ويحب والقلب طبعاً إتسمّا قلب من التقلب يعني مابيثبتش علي حال الحب جنين بيتولد ويتربي ولو إتولد في مناخ صحي بيعيش ولو إتولد في مناخ فاسد بيموت ومابيكملش جنين زي أي جنين ممكن يتولد طبيعي وممكن يتولد قيسري أو مبتسر وتضطر تحطه في حضانه بـ 150 جنيه في اليوم لكن مش معني إنه يتولد قيسري إنه يموت لأ ده ممكن يعيش أفضل من الطبيعي وعمنا الأديب الكبير عباس محمود العقاد ليه كلمه جميله بتقول ….. كل إهتمام قوي وشيك أن ينقلب بقلب المرأه إلي حب حتي الإهتمام بالإحتقار يعني الإهتمام والحنيه بتجيب الحب عند المرأه وأضيف أنا من عندي للعقاد إنها بتعمل نفس التأثير عند الرجل يعني الموضوع محتاج شوية إهتمام وأجدادنا مكدبوش لما قالوا إن الحب بييجي بالعشره بس مش معني كده إنك ترتبط بحد مش بتح أو بمعني أصح مفيش قابليه أو إحتماليه للتفاهم أو أرضيه مشتركه بينك وبينه لكن بردوا ماتصادرش علي قلبك وتقفله مره واحده
يعني حاول لأن الحياه في الأساس هي محاوله لإختراه طرق أفضل وأكثر راحه في الحياه
وأنت مسموح لك بوقت مفتوح طول ما إنت بتحاول
لو زهقت هاتلاقي رساله بتقولك جيم أوفر
ولو وصلت هاتلاقي رساله بتقولك كونجراتيوليشنز إنت كسبت وهاتتنقل للجوله التانيه بعد وقت راحه في القبر
يعني الدنيا طريق مش محطه
وعلي هذا الأساس فمحاولاتنا للحي هي محاولات لإستنباط طرق مريحه للسفر
مش محاوله للإستكانه لمحطه نهائيه

أنا مش بكتب الكلام ده لأني عايز أعمل فيلسوف أو أضخم في مواضيع أكيد إنت شايفها تافهه من بداية القرايه ولا باكتب كده بردوا علشان عايز ياسمين مثلاً تحاول تحبني بناءً علي تنظيراتي الخاصه أو طريقة تفكيري لأن محاولتي لإختراع قضيب سهل يصلني بمحطتي النهائيه لا ينفي أن لكل شحص بما فيهم ياسمين طريقه مفضله ولأكثر إمتاعاً في السفر قد لا تتفق مع طريقتي الخاصه أو مع موعد قطاري المفضل كما أني لا أكتب هذا لأني مهتم بشكل شخصي بالنظره الضيقه إللي عند أغلب الناس بالنسبه للحب لكن الموضوع فعلا محتاج رحابة صدر وتفكير عقلاني أكتر من إللي إحنا بنفكر فيه دلوقتي
لأن طرق السفر مش أوبن علي طول
والقطر مش بيستني حد
يعني ممكن وإنت مسافر تطلع في دماغك تشتري كانز بيبسي أو إزازة ميه معدنيه
أو تشطح وتطلع تشتري بيره بما إننا بلد إسلامي والبيره مش بتتباع في الأماكن الحكوميه فترجع سيادتك تلاقي القطر إللي كان ليك فيه مكان طلع وتبقي ضيعت علي نفسك فرصة السفر إللي ممكن ماتتكررش تاني
وكمان تبقي ضيعت علي صاحب الكرسي إللي جنبك فرصته في إنه يقضي رحله ممتعه
أنا بصراحه كل كلامي ده
أو إن كنت بتحب الدقه يبقي نصه علي الأقل مش لدافع شخصي زي التعالم والتفلسف
أو إني ألاقي بنت حلوه تقرا الكلام ويعجبها فتقع في حبي وأجيب ونش يطلعها ونعيش في تبات ونبات
لكن أنا بتكلم بهدف المصلحه العامه
وشايف إن ده دوري
دوري بما إني بحب الناس كلها وخيري لغيري وإللي في إيدي مش بتاعي لأنه بتاع الحكومه ما أقدرش أإتصرف فيه ولأني بردوا بحب مصر وقبل ماتسأل إيه دخل مصر في الموضوع ده هقولك إن إللي مش بيعرف يحب صح سواء حبيبه أو أهله أو نفسه بجد مش هيعرف يحب بلده صح

وإلا إيه ؟