دايره الرحايا وعضم فيها بيطحن
تهرب بهمك ينهشك ناب المحن
إسكر وسافر في الوجع حد النخاع
وإرضي الأساتذه بالجلد يوم تمتحن
******
باسألني وأسألكم بس الجواب لوّاع
هيّا صحيح الوطن بس إحنا فيها جياع
طب ليه بندفع عمرنا ونفديها
وإحنا إللي فيها سلعه وبتتباع
******
أراجوز كبير ….. أراجوز عجوز
وحباله إنتي والنفوذ
مهزوز ولعبه علينا باخ
والحكم ليكي ……….. مين يفوز؟
******
مهمومه إنتي وإنتي لينا الأم
وعيالك إحنا ومتساوين في الهم
ليه فيكي ناس بتعرق برفانات
وإحنا ليه سايبانا نعرق.. دم
****
مركب كبيره وقادره جبروت الطرق
حاولوا القراصنه بس مراكبهم ورق
حاولوا مع الربان أم مالت الدفه
ريسها صار قرصان يبقي المصير الغرق
*****
شباك بوسع السما بس الوطن أوضه
زنزانه لو منعمهة أبوابها موصوده
بر وبراح برّا شوفوا وماتحلمبوش
الشكوي متلجمه والدعوي مردوده
*****
شاعر ربابه أنا وطفت في ربوعك
بقيد شموعك غنا وباطفّي في دموعك
غناكي غيري إغتني ويافقر مواويلي
الإسم طرحك لنا والفعل بنجوعك
*****
شدو البلابل سما تحت السما نطاطي
صبحت مسخه أنا بهمومي وعياطي
ياهلتري الكروان لو عاشها في ترابك
كان يبقي مسخه لمين والكل في الواطي
*****
سبق وإنتي الميدان يا نيشان وتاج راسنا
وليكي فيه فرسان بالقهر حراسنا
خسروا السبق وتصبي لومك عندنا
ده إحنا يادوب الخيل والعبره سُيّاسنا
*******
لم تسقي شمسك يوم للعريانين الدفا
لم توفي للمحموم وقت أما بردك وفا
راضعه دفاكي الفلل والبدله والكاديلاك
أما الغلابه حطب في الدفايات إتنفي
******
أخضر يا ضل الشمس وقت نهار
أخضر يا بكره يافرحة المشوار
أخضر ولينا في الخضار بشره
بس إللي أدهي إنه خضار صبار
*****
نخاس ودلاله وكل لون مجلوب
عبيد تذاكر عزّها تدمي القلوب
حبلت دروب الأوليا يالأسئله
إنتوا أم المريدين ماشيينها بالمقلوب
*****
وسط البلد مهزوز علي إيقاعات بيادات
قلب البلد مفطور ع إللي في معتقلات
ومصالح القادرين بتغني للفقرا
مال البلد في علاء وجمالها في السياسات
******
جمال عيونه إتعلقوا علي طرف توب
متوضي من سلسال مبارك غير مشوب
حالف ليستر ألف ضعف فضايح أبوه
دي ذنوب جابوه للعرش عنها إزاي يتوب
******
******
الاشتراك في:
تعليقات الرسالة (Atom)
ليست هناك تعليقات:
إرسال تعليق