توجه ماركة مصيلحي لمصمصة الغلابه

السيد الدكتور علي مصيلحي رجل أكاديمي تولي الهيئه القوميه للبريد وتوقف انجازه فيها عند حد الافتات الخضراء الزاهيه دونما تنميه حقيقيه أو تقدير لمؤسسه هيا احدي أعرق وأقدم هيئات البريد في العالم ورغم ذلك فقد نال الرضي السامي من البيج بوس مبارك والذي يعتمد رضاه علي أهل الثقه لا أهل الكفاءه وانتقل مصيلحي الفاشل في البريد الي وزارة التضامن الاجتماعي واللي حكايتها حكايه هيا كمان

الوزاره دي كانت حاجه حلوه وكبّاره وماسكه نفسها واسمها وزارة الشئةن الاجتماعيه أيوه عليك نهور دي اللي كانت بتبرطع فيها الحاجه آمال عثمان وكانت ماشيه وأهي ةزاره نثبت بيها لأعداء الوطن والمتربصين ان احنا عندنا مساواه ومفيش تفريق بين الرجل والمرأه لكن المشكله زادت بقي ليه أقولك ليه

بقي شوف احنا عندنا حكومه بنت ناس كويسين وطبعاً فساده ريحته غطّت علي ريحة هيئة الصرف الصحي نفسها والحاجات اللي بتغرق الشوارع في العشوائيات وبما انهم ولاد ناس ومتربيين ع العز ماكانش ينفع نجيبهم نبهدلهم معانا مش كفايه انه9م بيشيلوا همنا واحنا شعب متعب ومايستاهلش وواقع من قعر الحضاره ومش عايز يتمدن وينضف وبداية التمدن انهم يبرطعوا في فلوسنا عربيات ومكاتب وفلل وتكييفات واهم يتكيفوا عشان يعرفوا يكيفونا ومع الفخفخه دي كان لازم الحسبه تخرّم علي اعتبار انها حسبة برمه والموضوع معقد وكان لازم بعد كل ده ان الموازنهه تعجّز 100 مليار جنيه في السنه وبما انها حكومة طلسقه اساسا وبالبلدي بتلبّس طاقية ده لده فعملوا ايه بقي راحوا ساحبين فلوس التأمينات اللي هيا سند وأمان الممولين اللي قضوا عمرهم يشتغلوا ومسنودين علي الفلوس اللي اتخصمت منهم في شبابهم تعيشهم في شيخوختهم وعشان يداروا تاني علي الجنايه دي راحوا فاصلين هيئة التأمين والمعاشات عن وزارة الشئون الاجتماعيه وادوها لوزارة الماليه قصدي ليوسف يطرس غالي علشان يبقي زيتنا في دقيقنا وتبقي وزاره واحده وحرّه في فلوسها قصدي بردوا في فلوسنا ةيرتاحوا من الجهاز المركزي وجودت الملط ووجع القلب ده وطبعاً ارتاحوا وعزبة بطرخ غالي كمان وسعت وطبعاً انتوا عارفين انه فاشل وموجود بس في الوزاره عشان موضوع حرية الأقباط واثبات انهم بيتولوا مناصب زي المسلمين مع ان الاقباط نفسهم بيلعنوه ومش عايزينه والغريب يا أخي انه ياخد أحسن وزير ماليه سنتين متتاليتين وعلي ايه ده يا حسره علي فشله وفساده وتهربه من الضرائب اللي هو مسئول عن =جمعها

المهم نرجع لموضوعنا بعد تشتيت وزارة الشئون الاجتماعيه فضل شوية هلاهيل سموها التضامن ورموا فيها علي مصيلحي وهوطبعا كفائته ماتحتملش اكتر من كده وهو أساسا مفيش في الحكومه كفاءات تنفع لحاجه خالص المهم ان مصيلحي ماكفّاهوش ان النظام بوّظ الدنيا وخرّب الوزاره فحب يسيب بصمته هو كمان وبدأ يخرّب في الدنيا من نفسه والموضوع ما بدأش بالقمح المسرطن اللي بيوزعه علي المخابز واللي أعلن في كذا حوار انه مش مسئول عنه وانه من اختصاص الحكومه اللي قبله وكأن الموضوع بالبركه وكل وزير بييجي يشتغل بمزاجه رغم ان الحكومه اللي قبله كانت بردوا برئاسة دكتور كلين

المهم ان الموضوع اتطور مع مصيلحي وبدأ يحاول بجدعنة ولاد النظام انه يساهم في حل مشاكل الحكومه من انفاق وتغتغه والذي منه وبما انه وزارة تضامن اجتماعي يعني المفروض انها تصرف مش تلم فحاول بخبث يتحايل علي الموضوع ده وفكّر وقدح ذهنه وطلع بفكره بنت ناس زي الحكومه

ايه هيّا ؟ أقوللك

د/ مصيلحي فكّر ان عنده مورد مهم معطّل اسمه رحلات الحج والعمره واللي نصيبه منها فوق الـ 11 ألف تأشيره ومع انهن وزارة تضامن والمفروض ييسر علي الناس وان حصته اساسا قليله يعني تبص تلاقي الداخليه بتاخد 20 ألف تأشيره مع انها مقتصره علي الشرطه بس في مقابل وزاره بتخدم ملايين وحج الداخليه نفسه مدعم بمقارنة حج التضامن اللي بيكلف الحاج ثمانية آلاف جنيه مع ان الضابط في الداخليه بيدفع أربعة آلاف بس بالمقارنه بيق بالاقامه هناك والخدمه وكمان بالمرتبات والادخول هنا لان الداخليه من أعلي الابواب في الموازنه بخلاف البنود السريه والدخل اللي بييجي من المخالفات ورسوم الخدمات وبيتحصل منه نسبه كبيره لصالح أفراد اشرطه المهم ان مصيلحي ما راعاش كل ده وبص للغلابه لانه عايز يجيب تمويل ففكر في انه يسحب تنظيم رحلات الحج والعمره من الجمعيلت الاهليه وعن طريق الاداره المركزيه للحج والعمره بالوزاره يؤسس مؤسسه تتولي تنظيم هذه الرحلات والمؤسسه دي تعتبر جمعيه أهليه أيضاً وخاضعه لقانون الجمعيات الأهليه وبكده يقدر من تحكمه في السعر والغاء الفروق اللي كانت موجوده بين اسعار الجمعيات انه يحقق ريح والفروق دي قبل ماتسأل كانت موجوده أساساً لطبيعة الخدمه والحاله9 الاقتصاديه يعني مش معقول نساوي بين واحد طالع يحج من مصر لجديده وواحد طالع من كفر المصيلحه المهم ان الموضوع عند مصيلحي ماوقفش علي كده كمان مش باقولكم انه عايز يسيب بصمته

سيادة الوزير بردوا لسه التمويل مش مالي عينه هو والحكومه والرئيس وشايف ان الناس لسه لاقيه تاكل ولسه مامصوش دمها بشكل كامل يعمل ايه عبقري البوسطه يروح طالع كده فجأه ويقولك ان بنك ناصر الاجتماعي بيخسر وانه لازم تعاد هيكلته بماى يؤهله لتحقيق ربحيه تساعده علي ءالاستمرار في تأدية عمله

والربحيه دي تيجي ازاي يا عم مصيلحي؟

نقسمة بنك ناصر انصين متساويين نص يقدم الخدمه الاساسيه للغلابه والمحتاجين والنص التاني يتعانمل بشكل افقتصادي حر مع المستثمرين ورجال الاعمال

طيب يا عم الحاج دول رجال الاعمال دول هما اللي نهبه البلد وزادوا مشاكله الاقتصاديه هاتجيبهم في بنك ناصر يسرقوا آخر حقوق الغلابه علشان تاخد منهم ربح وبعدين بنك ناصر ازاي بيخسر مع العلم ان كل المتعاملين معاه من الناس المحترمين اللي مش بيسرقوا ولا بيزوغوا ومنتظمين في الدفع وأكيد انت عارف كده يعني هوكده بيحقق ربح وبعدين لو بيخسر اساسا فده انتوا سببه لان البنك ده تم اهماله نتيجة ان الغلابه مش من اولويات السيد المبارك ومن ساعة ماتم انشاؤه في سنة 1970 وهو مش لاقي رعايه ولا اهتمام مع انه اخر مكاسب المرحله الاشتراكيه الحقيقيه اللي باقيه للناس ويبدوا ان ده مش اللي عايزاه الحكومه ولا الرئيس لأنهم مش عايزين الناس اساسا وأنا أعتبر ان الممارسات الحكوميه دي بتاع كلين ومصيلحي وشركاهم مؤشر مهم جداً يجب الانتباه الشعبي له لان ده مقدمه مش نتيجه وأنا شايف ان النتيجه هتكون الغاء وزارة التضامن الاجتماعي بعد الغاء كل مايتعلق بالاشتراكيه في الدستور وفتح البلد علي البحري أقوي من أيام الرئيس المؤمن السادات وطبعاً مبارك ابن كفر المصيلحه بعد مكابقي يملياردير من فلوسنا هو ولاده وبعد ما ناسب مليارديرات علشان يداري فلوسه وفلوس ولاده في قلب فلوسهم يهمه ايه الناس الغلابه

البلد دي بيتصرفوا فيها علي هواهم هما المالكين واحنا البلوريتاريا الرّثه والا عبيد الأرض

والمفروض يكون التصرف غير كده

صح النوم يا مصريين