وتم تنفيذ الحكم صباح اليوم

يا أخي مابقتش عارف إيه حكاية الأحلام الحلوه معايا
كل أول شهر أحلم حلم حلو
ومع إنه لا بيقدم ولا بيأخر أي حاجه في البلد دي
إللي مابقاش لينا فيها إلا الأحلام
إلا إنه بيهون شويه من الخنقه إللي بيدلقوها علينا صبح ومسا
ولاد الذين
إللي شغلتهم وسبب مجيئهم الدنيا إنهم يسرقونا وينرفزونا وخلاص
دكاترة علم النفس بيقولوا إن الأحلام تعبير عن الرغبات المكبوته
ومابيعترفوش بمسألة الرؤيه التنبئيه خالص
ومع إحترامي ليهم
إلا إني علشان أهونه عليا وعليكم لازم نوهم نفسنا إنها رؤيه
وبما إني صالح ومن أهل الله المكشوف عنهم الحجاب
فالحلم ده أبشروا
قريب جداً إنشاء الله
ما علينا من كل ده
نرجع للحلم إنما حلم إيه
شةف ياسيدي

حلمت

خير اللهم إجعله خير

إن يوم العيد الجاي

وإلا علشان مابقاش كدّاب أنا بصراحه مش عارف إللي جاي وإلا إللي بعدهل لأن أنا ما بصتش في النتيجه وقتها بس ربنا يعجّل

إن الرئيس مبارك في غرفة الإعدام في ليمان طره وواقف وراه المدونين إللي إعتقلوا ولسه بيعتقلوا عبد المنعم والشرقاوي وكريم

في إيديهم موبايلات

أيوه من الحلوه الغاليه إللي بتصور دي بسم الله ماشاء الله عقبال أمالتكم

إن 70 وإن 90 وإن 95
وهات يا تصوير

والمفاجأه إن إللي كان في حبل المشنقه هو مبارك مش غيره

يعني ماكانش بيحضر حفلة إعدام سواريه بالإسموكن والبابيون

علي شرف الإخوان

وإلا المدونين

لأ ده بسم الله ماشاؤ الله كانت الحفله كلها علي شرفه هو

قبلها بأسبوع في الحلم بردوا تلقي مبارك وهو في مخبأه نبأ مقتل ولديه قصيّ وعديّ

قصدي جمال وعلاء

علي إثر حقنهم بحقنه مخففه من مياه الشرب العاديه التي يشربها المواطنين إللي معدتهم بتهضم الزلط

كان مبارك كث اللحيه أغبر الوجه

أيوه زي وجوههم عليها غبره

وإلا زي أبو لهب في الأفلام العربي القديمه

وكان باصص للأرض في إنكسار

وبيني وبينك رغم إني مش باحب أشمت في حد

خصوصاً في المواقف إللي زي عبود وأحمد حلمي

إلا إني في الخلم بردوا نطيت من علي السرير

وطلعتله لساني

وعملتله حاجات وحشه زي إللي إتعملت لعماد الكبير في أقسام الشرطه

وتم تنفيذ حكم الإعدام في نفس موعد الضحيه وده خلاني في الحلم بردوا عفيت عن الخروف إللي كنت جايبه أضحي بيه وقلت مبارك كفايه
وبعد ما نزل علي الأرض مسخسخ
ومطلع لسانه
جريت من علي السرير تاني
وسحبته من الحبل
وقال إيه في الحلم يا خويا

كان لابس هدوم قديمه ومقطعه وريحتها كانت طالعه عليا من شاشة التليفزبون عاميه عنيا
ما أنا نسيت أقولك إن الحلم كان بث مباشر
يعني كنت شايفه لايف وعلي شاشة التليفزيون
والداهيه
إنها كانت القناه الأولي المصريه وكان بث حصري
لدرجة إن الجزيره سرقت لقطات قليله
ورفعنا عليها قضيه بعد ما صحيت من النوم

المهم تم تنفيذ حكم الإعدام وسط فرحه جماهيريه عارمه

وأنباء عن تشكيل حكومه وطنيه انتقاليه برئاسة أي مواطن شريف ماكانش يعرف الحزب الوطني ولا حد فيه

وعضوية مواطنين شرفاء بردوا غير إللي غاروا في داهيه

أيوه نسيت أقوللك

إن في الحلم بردوا شفت

رجالة الوطني ده لو كانوا رجاله_ بعد المحكمه ما إستخسرت فيهم الإعدام وأمرت بتسليمهم للمستشفيات والمركز القومي للبحوث كعجول تجارب

علشان نختبر عليهم الميه والأكل لحد ما ننضفوا من البلاوي إللي حطوها فيه وهما كده هيموتوا من غير إعدام ولا حاجه
وأحمد هز في الحلم بردوا لبسوه سيخ حديد 12 لنيه
طلع من حلقه
وململ سوزان إشفاقاً عليها بغد ترملها وموت عيالها
سلموها لدار مسنين
من إللي هيا بترعاهم لوجه الله من غير فلوس يعني مش زي دور المسنين بتاعة الناس الأغنيا إللي قرفانين من أهلهم
وبعد الحكم والذي منه والحاجات دي

صحيت

أيوه نسيت أقولكم إن ده محصلش زي العراق يعني ما كانش فيه قوات تحالف وحرب والحاجات دي

بس ده حصل بإنتفاضه شعبيه

وعلم مصر هو إللي كان مرفوع

علشان مايطلعش أسامه سرايا ومصطفي بكري ومرسي عطالله

وإللي زيهم

يقولولي إنت أحلامك مموله من أمريكا لتخريب البلد
وإلا إنها أون لاين من القاعه البيضاويه في البيت الأبيض
وإلا إخراج ستيفن سبيلبرج وأنا مش عارف

يعني كان تغيير من الداخل أهوه

يارب يتحقق

يارب يا خويا يارب