هو الراجل ده حمار وإلا بيستحمرنا وإلا بيحكم واء الواء

طبعاً إحنا في موسسم سنوي ومولد شغّال وكل الناس مش مرحومه منه لا أرضي ولا فضائي
مولد عيد الشرطه
كل سنه وإنتوا مسحولين ومسجونين ومعتقلين
المهم بقي إن الإحتفال بالعيد المبارك
نسبة إلي السيد الرئيس محمد حسني مبارك الحكيم الراشد القائد الحاجات الكتيره الحلوه مع بعض
الإحتفال ده تم بدري يوم علشان طبعاً يوم 25 موافق السنه دي الجمعه وما ينفعش الناس إللي ما يعرفوش ربنا يحتفلوا في اليوم بتاع ربنا والروحانيات
أنا تابعت التغطيه الرسميه إللي قدمها التليفزيون المصري لليوم الذي كان يحضره لفيف من الساده المسئولين الحاليين والسابقين
من كمال الجنزوري لحد أحمد نظيف وغيرهم وغيرهم
إضافه لنص ظباط الداخليه
أنا تابعت التليفزيون المصري المستفز الخانق لأني كنت متوقع أضحك سواء ضحك من كتر الهم أو ضحك من غباء من قدر لنا أن يتولوا زمام أمورنا
والحمد لله ربنا ما خلفش توقعي
بس الإكتشاف والدليل والفضيحه إللي أنا إكتشفتها النهارده وتعتبر سبق
هاتكلم عنها في بوست تاني بعد ده علشان البوست ده عايز أفرغ فيه شحنة الكبت إللي بيسببهالي السيد القائد المظفر المهيب الركن كل ما أشوفه بيتكلم وبيجعجع ويبعبع في أي مكان وإمبارح بعد معرض الكتاب طلع ضربله كام تصريح مع الصحفيين ماركة أبو لمعه وحرق دمي
والنهارده بيزود حرقة الدم
مش كفايه إن الشرطه إللي قضت علي إللي باقي للمواطن المصري بعد ماراح منه كل حاجه إبتداءً من البلد وحتي الحياه الكريمه حتي كأي سايح ضيف
مش كفايه المناسبه إللي زي الزفت أساساً وتخنق لوحدها
لأ يطلع الشملول علشان يزود طين الخنقه بلّه
وقبل منه يطلع حبيب العادلي يدلي بدلوه
ثم وصله طويله من التكريمات وأنواط الإمتياز فاز فيها بنصيب الأسد بالنسبه لعددهم من بين المكرمين
زملاء ومرؤسي العادلي السابقين
الباشا كرّم خمسه من أمن الدوله
طبعاً لأن هما إللي حافظين أمن الدوله ولاغيين أمن المواطن لصالح فئة الحكام وسيادة القائد الركن
الركن دي مش إللي هعيا مورنر بالإنجليزي
أحسن حد منكم يلبس جزمه ويشوطه والراجل عنده تمانين سنه ومش مستحمل أساساً
ما علينا
المهم بقي
وصلة حرقة الدم التي جاءت من السيد القائد وعلي مستوي القمه لتعكس مدي اللامبالاه التي يتمتع بها أو لنقل الغنفصال عن مصر الحقيقيه وعن شعبها
وهذا أقوله كي لا أقول مفردات أخري يعاقب عليها القانون
فأنت حينما تكون في موقف صعب أو مخزنوق وعايز تخلع من واحد صاحبك أو من بنت لزقه بتصدر الطرشه
يرد عليك صاحبك أو ترد البنت وتقولك إنت بتستهبل
تقريباً هو ده التوصيف الأصح
حينما أجد رئيس الجمهوريه وبعد الوصله المتوقعه التي تكفي لحفظ ماء الوجه والرجوله المناسبه لشيخ في الثمانين من عمره
مع موضوعات تحظي بسخونه شعبيه وإنتقاد صريح لسياسة النظام
ينجلي الرجل الذي بلغ من العمر أرذله
ويعلن أنه عنتر الذي سوف ينتصر لعبس وكرامتها علي هوازن المفتريه
ولولا الملامه كان إنشكح وقال

وفي الحرب العوان ولدت طفلاً ومن لبن المعامع قد سقيت


او


ولي بيت علا فلك الثريا تخر لعظم هيبته البيوت


الراجل طجبعاً قال البقين إللي ممكن أي مدون مبتدئ من المنضمين لأمانة الشباب في الحزب أو لأمانة السياسات يكتب أحسن منهم بكتير
لا تدخل والسياده والكرامه
ونفس الردح الحريمي بتاع سرور والطقم إللي سبق في الرد
أين كانت هذه الأنظمه من إنتهاكات حقوق الإنسان في العراق وأفغانستان وفلسطين
وهات يا تسقيف
أمال هو ساحبي وراه تلات أربع تلاف نطع ليه
علشان يسقفوا والموضوع يسخن والكلام يحلو
وعلي فكره لحد كده أنا ماكانش عندي أي أزمه بالنسبه للكلام ده
لأن الإتحاد اغلأوربي نفسه قبل ما الكلام ده يوصلنا عارف إن النظام المصري شاطر في الردح وهايجعجع بالشكل ده
وأنا كمان وإنتوا علي ما أعتقد عارفين
وما عنديش مشكله عميقه مع مسألة سن مبارك وإنه بقي رجله والقبر ولو عندي في البيت واحد زيه مش هامسكه مصروف البيت رغم إن إحنا _ أو هو من نفسه بمساعدتنا وصمتنا_ مسكناله البلد كلها
الراجل تعبان
الصحه زفت
النظر طين وأنا شخصياً عبر اللقاءات الأخيره قعدت أمارس هوايه مسليه
وهي حصر عدد الكلمات في الورقه الواحده التي يلقي منها مبارك لمعرفة مدي قوة نظره
وكان سبب كده إن أنال سمعت ناس كتيره بتقول بعد نظر الرئيس بعد نظر الرئيس
قلت أما أشوف بنفسي
تصدق يا مؤمن ويا مؤمنه
الورقه من 18 إلي 24 كلمه
لك أن تتخيل مقياس نظر السيد الرئيس الذي لا يصلح ولا يسمح له بأن يسير بمفرده قبيل المغرب مثلاً
لا أن يسير بدوله قوامها ثمانين مليون بني آدم في عالم ضبابي ظلامي غامض
وبردوا لحد كده ماكانش عندي أي مشكله
إنما إنه يقعد يمدح في الداخليه في المطلق كده جحتي من غير تخصيص أو إستثناء
يقعد ييجي نص الكلمه يمدح فيهم فده إللي أوشك أن يوصلني إلي هارت أتّاك
وأنا في أغلب كلام مبارك إللي أغلبه طبيخ ولت وعجن ورغم إن قناعتي الأساسيه إن ملكات وقدرات الرئيس مبارك العقليه والسياسيه والثقافيه علي بعد سنتيمترات من الخط زيرو
إلا أنني كنت أتعامل دوماً معه ومع تصريحاته بمراسم نقاش بروتوكوليه إلي حد ما كرئيس جمهوريه ولا يصح أن نناقشه بنفس البساطه التي نتناقش بها فيما بيننا
لكن النهارده تحديداً وبعد الكلام والمدح إللي قعد يرص فيه علي الشرطه النظره إتغيرت وياريته ما كان إتكلم من الأساس
كان ممكن يتكلم بشكل تاريخي
أو يتكلم في مواضيع هامه ويهرب من المناسبه
لكن واضح إنه قاصد أو مش عارف
أو إن حبيب العادلي أو حد من أمن الدوله هو إللي كاتبله الكلمه
وإفتكرت واحد صاحبي قعد مره يقولي إن إحنا إللي إنتصرنا في سبعه وستين
وإن إتفاقية كامب ديفيد بتلزم اسرائيل تاخد الغاز المصري بتلات أضعاف سعر السوء العالمي
بصراحه كل التفسيرات إللي قدرت أجمعها
هيا إن الراجل ده يا عبيط
يابيستعبط
يا بيتكلم عن واء الواء