دعم إيه إللي إنت جاي تقول عليه...... إحنا بقي ضهرنا في الحيط ياخلق

الواحد زهق وغلب وطلع عين اهله وإللي جايبين أهله من نقد ورفض سياسات الحكومه النظيفه الذكيه التي بلانا بها الله من سوء أعمالنا وحكامنا وبلانا بها مبارك من سوء أخلاقه وتربيته
الجميع يعلم حجم المشكلات التي أتت هذه الحكومه عليها وحجم ما أضافته علي غير مثال وبإبداع شخصي يحسب لها من مشكلات تحتاج قدر أعمارهم مجتمعين لإصلاح ثارها خصوصاً طقم محمود محي الدين وأحمد درويش وأنس الفقي ورشيد محمد رشيد
طقم الأشبال إللي جابوه يجرب سياسات تجاريه فينا وهما خبرتهم في الحياه شوية فلوس الله أعلم بمصدرهم وتلاتين أربعين سنه عمر ما يجيبوش لواحد فيهم جزمه من شركة باتا
عرفنا ووقعنا وإتبلينا وصبرنا
لكن أن تلتفت الحكومه لحل مشكلاتها عن طريق الشعب متخليه عن كافة الضمانات والمكاسب التي تحققت بعد سنوات طويله من الويل والثبور وعظائم الأمور
لترفع يدها عن الجميع معلنه مبدأ أنا ومن بعدي الطوفان فهذا مرفوض بالطبع
الحكومه إنهارت وخربت البلد لا أحد يستطيع أن يماري في هذا ومن يحاول المجامله سوف يقول في أحسن التقديرات أن الحكومه فشلت
من حقها أن تغير سياساتها التي أتت وعملت بها من أجل تصحيح المسار وتحقيق ما تصبو إليه وتنفيذ البرنامج الإنتخابي لسيادة الرئيس لا أطال الله عمره
لكن هذه الخطوات كيف يتم تحقيقه
لقد تم إستنزاف كل الطرق وكل الوسائل والخدع من بهلوانيه ونصب وإطلاق أيدي وديون وبيع وغيره
حولوا القطاع العام إلي قطاع أعمال وبدأوا في إفلاس الشركات زوراً لبيعها لتحقيق عائد سريع يغطي حجم الدين والورطات التي وقعوا فيها في أقرب وقت ممكن وبعيداً عن أي نظره مستقبليه
ولم يفلح هذا
حاولوا خداعنا عبر وضع حصيلة البيع ضمن الإستثمارات الأجنبيه ليوهمونا بتحسن مؤشرات الإقتصاد زوراً ويخرج علينا الشملولإبن ماما سوزان ويقول أن الإقتصاد تحسن لكن الشعب مش حاسس
والله أنا لولا محترم ماما سوزان عشان سنها ومرضها كنت قلتله كلمه وحشه
يعني إحنا شعب جبلات ما بنحسش الإقتصاد بيتحسن وعلاء ورشيد وشيفروليه وميد إنفستمنت وهيرمس حسوا
طب إزاي إحنا هانحس
مش عارف إن كل واحد من دول علي خلايا الإحساس عنده ماتتشبع وتصل لحالة النشوه يكون خلص علي إقتصاد تلات دول
ماعلينا قدرنا ونصيبنا نخلص من حرامي نقع في شيخ منصر وأهي بتتقضي وعايشين
لأ ده مايعجبش الحكومه ياروح أمك
الحكومه مش عايزه ناس عايشين هي عايزه شوية عبيد والباقيين يموتوا
طب إزاي إزاي إزاي
أيوه
لقيتها
هما مش مصريين
وبيحيوا مصر ومصر هيا أمي ونيلها هو دمي
طب مصر محتاجه
نخليهم يصرفوا عليها
نخد إللي مصر بتدهولهم ونبدأ بعد كده نخد إللي جابوه بالفتاكه من ورا مصر
ههههههههههههههههههههههههههههههههههههههههههههههههههههههههههههههههه
إفتكرت نكته حلوه
بيقولك مبارك قابل إبليس
قاله يا أخي الشعب ده مجنني ومش عارف أعمل معاه إيه
إبليس: إعمل معاه كذا وكذا وكذا
مبارك : ياااه ده إنت قديم قوي ده أنا باعمل معاهم كذا وكذا وكذا
إبليس : ياراجل !!!! إتقي الله


هههههههههههههههههههههههههههههه
ماعلينا نرجع للموضوع
الحكومه موروطه حلوه موروطه دي إسم مفعول من الورطه أخيراً الحكومه بقي مفعول فيها ف حاجه
ماعلينا تاني
الحكومه موحوله _ بردوا إسم مفعول _ في ديون ومشاكل وخراب بيوت إقساط وفوايد الديون أو بلغة الميزانيه خدمة الديون حاجه كده تخش علي 100 مليار جنيه والدعم بردوا حاجه تخش علي 100 مليار جنيه
طب نوفر من إيه الديون لازم تتدفع إمال جمال يبيع ويكسب وياخد فرق إيه
والشعب والدعم في داهيه
وأدي 200 مليار من أضخم ميزانيه صدعونا بيها مش قلنا إنها حكومه فنجرية بق بالذات إللي مايتسمي بطرخ غالي ده
مع إنه من أردأ أنواع البطرغ _ قصدي البطارخ_ مش عارف غالي إزاي
ماعلينا تالت
إشتغلي يا حكومه وكدي ووفري علشان مصر
مصر عيانه يا حكومه إتسحبي من دعم الخدمات الصحيه بتاع الغلابه وإعملي شركه قابضه للتأمين الصحي تجيب إيرادات وما تدفعش والحجه فصل الإداره عن التمويل وحولي المستشفيات العامه في المحافظات لمستشفيات إستثماريه بفلوس وعالجي مصر أما أمنا تعبانه


مصر جعانه يا حكومه إرفعي الدعم إللي بتدفعيه لولاد الكلب الشحاتين وأكلي مصر أمال أمنا هاتموت من الجوع وما عندناش أغلي منها وإللي يفرط في أمه يبقي نظيف أجدع منه

طبعاً في كتير قوي من تضحيات الحكومه بنفسها قبلينا علشان مصر لكن كله إلا رفع الدعم لأن ده تحديداً إللي هايموت مصر
القضيه قد تكون في ظاهرها بسيطه
أو كما يقال في ظاهرها الرحمه لكن إللي أكيد إن في باطنها العذاب والجوع والسعير
الحكومه بتحاول تلبسنا العمه زي كل مره وتقوللك إيه يا جدع إن محدود الدخل حاله يصعب ع الكافر ولازم نساعده والدعم أبصر إيه ما بيوصلش لمستحقيه وإحنا نديهم فلوس ويشبرقوا نفسهم وإللي عايز يتجوز يتجوز وإللي عايز يحشش يحشش وغللي عايز يجيب فياجرا يجيب
ماهو ده دعم جنسي الحكومه نسيت تعمله
هيا عملت الضعف الجنسي بس الدعم الجنسي جاي مع الدعم النقدي
الـ 100 مليار جنيه إللي الحكومه بتذلنا بيهم منهم 50 مليار جنيه دعم طاقه رايح منهم حوالي 40 مليار جنيه علي المصانه والجراند شيروكي والعيون والبي إم دبليو
لتر البنزين بيحطه الراجل الموظف إللي علي الدرجه التاسعه وراكب 124 أو 128 زيه زي سامح فهمي ده إذا كان بيدفع لا سمح الله
أو زي منصور شيفروليه ده إذا ما كانتش عربيات مجموعته ومعارضه والزباين بيحطوه بلاش
أو زي أي وزير من وزراء المجموعهة الإقتصاديه إللي هما بالأساس حيتان بره
لأ وجزء كبير من الدعم ده بيروح لجهاز الشرطه إللي بيحطلنا حاجات في الحاجات ومطلع الحاجات إللي قدام وإللي ورا
وعندهم أسطول عربيات مش عند الجيش إللي بنتباهي بيه وخاربين بيه الدنيا مش عارف علي إيه
ونص بونات البنزين بتاعة الشرطه بتروح لعربيات الضباط وعائلاتهم الخاصه
وبيوزعوها محبه لإصحابهم ومحاسيبهم
نرجع لموضوع الدعم الأساسي وإللي يخص الغلابه
أرجو إن ما حدش يستهين بالموضوع
رفع الدعم يعني أكبر حركة تحرير للأسعار يشهدها السوق المصري
وإبقوا قابلوني لو الطبقه المتوسطه إللي هيا خلاص بتودع عرفت تاكل
أكيد هانتفق علشان مانبقاش ظالمين إن في تجاره في الدعم وإن جزء كبير ما بيوصلش لمستحقيه بس ما أعتفقدش إنه أكتر من دعم الطاقه إللي بيروح للمصانع ولا رجال الأعمال ولا أكتر من صناديق حماية مخاطر الإستثمار في البورصه ووزارة الإستثمار
المهم الآليه التي يتم بها تنقية الدعم وإيصاله لمستحقيه ومنع المتاجره فيه
كل المؤشرات تشير إلي أن الدعم جاري آخر الترتيبات لعملية رفعه واستبداله بدعم نقدي سيكون أكبر مقلب خادع وكاذب للشعب المصري
لا أعتقد أن حجم ماسيقدمونه من دعم نقدي سوف يكافئ مقدار الإرتفاع المتزايد في الأسعار
ومقدار التضخم الذي يستشري يوماً عن آخر
ولا أعتقد أنهم سوف يعطون ما يكفي لأن تشتري الأسره نفس إحتياجاتها بالأسعار الجديده ورغيف الخبز فئة الخمسه ساغ سوف يكون سلعه نادره بربع جنيه
ناهيك عن أن هناك فئات كثيره من قاطني العشوائيات وتحت الكباري والخرابات لا يشملهم الدعم المنهجي المنظم ولكنهم يستفيدون منه عبر المستشفيات الحكوميه والخبز المدعم وحتي الكهرباء وإسطوانات البوتاجاز
والتي بعد رفع الدعم سوف تصبح فئات غير موجوده علي خريطة الدعم النقدي وليس لديها القوه الشرائيه التي تتطلبها السوق
البلوي كبيره وعظيمه ولا يحس بها إلا فقير أو محتاج وأعتقد
أن الأغلبيه في مصر هكذا
لكن الأدهي والأهم في آن هو كيف سيتم تحقيق ما يصبو هم إليه بأقل الخسائر بالنسبه لنا
كيف ستتم عمليه إحصاء الفئات المحتاجه
أو ما هو مفهومه عن الإحتياج أو حدود إحتياج الدعم والمساعده
تكلمت في هذا الأمر مع أحد قيادات الحزب الوطني
والذي قال لي أن الكلام دائر في هذه الآونه حول أكثر من طريق للتقدير
منها فاتورة الكهرباء
أو إمتلاك سياره
أو مستوي دخل 1000 جنيه للأسره
وواضح أن كل منهم مقياس مختل بذاته أو مجتمع مع الباقين ولا يصلح للتقدير
لأن فاتورة الكهرباء لا تدل علي مستوي المعيشه بشكل كلمل وإن كانت دليلاً جزئياً لكنها ليست دليلاً كاملاً يمكن التعويل عليه كم ا أن مسالة إمتلاك سياره أيضاً هي الأخره لا تعد دليلاً علي رفاهية الفرد أو مستوي معيشته لأن هناك من يمتلكون 124 او من يمتلكون بالتقسيط أو بقروض
و1000 جنيه للأسره لا أعتقد أنها تعتبر دخلاً من الأساس
متوسط الأسره المصريه خمسة أفراد 1000 جنيه تساوي حوالي 180 دولار
يعني متوسط دخل الفرد 36 دولار شهرياً
يعني دولار وعشرين سنت في اليوم أقل من دولار وربع حتي
وطبقاً للمعاير الدوليه فهو تحت خط الفقر ويقترب من خط الفقر المدقع
الموضوع ده بيحرق دمي
وسيرة الحكومه والنظام والذي منه بتجيب لي أرتيكاريا وهرش وحساسيه
م الآخر السيره دي تغم وتجيب الهم
وبقي ضهرنا في الحيط
هانروح فين تاني بعد كده
يارب يا تتوب علينا من النظام والحكومه دي
ياتتوب علينا من الشعب إبن البارده ده إللي بياخد علي قفاه يومياً ويقول
كمااااااااااااااااااااااااااااااااااااااااااان