السبت، 22 سبتمبر 2007

عجائب الدنيا السبع

ممكن حد كده من العنوان وقبل ما أبدأ يقول إيه البايخ ده إللي بيفتح الموضوعات القديمه والعقيمه علي طول
وبصراحه أنا مش لسه عارف ولا حاجه
كما إني مش عايش علي القمر ولا عندي
أزمه في الجرايد ولا في الأخبار
أنا يمكن باعرف الأخبار قبل وقوعها
حكيم روحاني حضرتك
حكيم عيون أفهم في العين
لا مؤاخذه نسيت
نرجع لموضوع البوست إللي هو عنوانه عجائب الدنيا السبع وطبعاً قبل ما أقول أي حاجه كله أكيد متوقع إن أنا هاتكلم عن العجائب الجديده والتصويت الذي حدث وخروج مصر دون رقم في السبه رغم أن بها اكثر من ثلث الآثار العالميه
أيوه صح هو ده بالظبط إللي أنا هاتكلم عنه
العجايب الجديده والوكسه المصريه الجديده القديمه
بس أوعدكم بتناول جديد
ربما يكون قديم أو حد فكر فيه بس ما أعلنهوش بس أنا أول واحد أعلن التصور ده والله أعلم
في البدايه كده ومقدمه تمهيديه منطقيه طبيعيه للموضوع
أن أعلن أن إختيار عجائب الدنيا السبع الجديده كان عبر مسابقه عالميه علي شبكة النت والنتيجه تأتي بعد التصويت العام وبأغلبية الصوات المرشحه للأثر
والبدايه من عندنا إن إحنا مادخلناش المسابقه من أساسه ولا رشحنا أي عجيبه
وطلع علينا الساده مثقفي وعلماء آثار وصحفيي ومذيعي الحزب الوطني بالرفض القاطع والتبرير الكامل بأننا خارج المنافسه ولا يصح أن ندخل منافسه مع آثار حديثه ونحط الهرم قصاد تمثال المسيح إللي في البرازيل وعمره سبعين سنه يادوب
لأن ده يبقي عيب علشان الهرم كبيييييييييييييييييير وعمره كام ألف سنه
وقبل توضيح رؤيتي الجديده المستنبطه بتفكير منطقي واعي فردي متفلسف بحت
أحب أرد علي الباردين علمائنا الأجلاء
وأقولهم إن آثارنا هي في الواقع في منافسه كل يوم وإن إحنا محتاجين المنافسه مش مستغنيين عنها
وإن كل زباين شركات السياحه في العالم لما بيروحوا الشركات دي لازم ياخدوا فكره عن الأماكن وفيهم ناس لا تعرف الهرم ولا تعرف مصر كلها وبيقعدوا يشرحولهم وفيهم إللي بييجي وأكيد فيهم إللي بيرفض
ثم ياعباقره يا فلاسفه
لما إحنا حلوين وآثارنا متصيته وف غنا عن المنافسه ليه الإعلانات إللي متكلفه ملايين وبندفع لها ملايين علشان تتعرض كدعايه في القنوات العالميه مع إن فيها الهرم هو أكتر حاجه ظاهره لما هو ف غنا عن المنافسه كده
نرجع للموضوع الأساسي أو لب الموضوع وفوله والسوداني بتاعه
هذه المسابقه لم تكن مسابقه دوليه رسميه يعني لم تكن تنظمها هيئه دوليه رسميه إنما نظمتها هيئه خاصه
ومعروف طبعاً إن العالم دول لازم يكسبوا أو هو ده سبب المشروع الأساسي
ييجي منين التمويل اللازم للتسويق والدعايه والمصاريف وهامش الربح
يبقي من الفوتينج
التصويت يعني
وفعلاً كان التصويت بدولارين للفرد
وهو ده لب الموضوع
ده ربح المؤسسه
وده سبب مشكلتنا إحنا
الشعب المصري بتعداده في عملية التصويت خاصة وأن نسبة التعامل مع الإنترنت عاليه كان من الممكن أن يساند الأهرامات إلي حد النجاح
لكن الشعب المصري علي يد النظام الكريم المبارك تم إفقار أم إللي جابوه إلي درجة أن 38% منه يعيشون علي أقل من دولار في اليوم مش دولارين
يبقي هايجيبوا منين فلوس التصويت
طبعاً النظام عارف إنه سبب الفقر ده وعارف إن الشعب مش هايقدر يصوت غير لما الريس يموت أو أي حد من العالم الكبيره دي غنما يصوت علي الهرم فمش معاه فلوس
تبقي ليه الفضايح
يبقي هانخسر في التصويت
الأهرامات تدخل مسابقه وتخسر
لأ يبقي الحل إيه
الحل إن إحنا نقاطع المسابقه الوحشه المنيله بستين نيله دي وهات يا شتيمه وهجوم وتبقي كرامتنا محفوظه
رفضوا يدخلوا أحسن من خسروا
خاصة إن الخساره هاتبقي ف وشهم لوحدهم
لأن هما سبب فقر الدم والمال وكل حاجه إللي أصابت البلد والشعب
هذا بالطبع هو طبع النظام المصري الأثير
الإبتعاد لا المواجهه
خلق المشاكل وتركنا للمعاناه من جرائها وحرق دم إللي جابونا وبس
طبعاً ده بيتكشف أكتر لما نلاقي إن بلد زي الأردن فتحت الفوتينج مجاناً طوال أيام التصويت للمسابقه وكانت النتيجه أن فازت بإحدي العجائب
المسأله مع النظام المصري لم تكن مسابقه مشبوهه
لأن مكاسبنا من ورائها كانت بحق كبيره
أكبر مئات المرات من ألاف الساعات الإعلانيه في قنوات عالميه تكلفنا ملايين الدولارات من لحم الحي
نظام بيوفر وبيطبق الحكمه إللي في دور موسيقار الشعب الشيخ سيد الله يرحمه


شد الحزام علي شعبك
لو يشبع يخرب بيتك
خليه يبكي علي طول
لو يفرح مش هايسيبك


عذراً للتصرف
ماهو النظام بيتصرف فينا ومعانا وعلي دماغنا ليل نهار غشمعني أنا
هي الكعكه ف إيد اليتيم عجبه
عمالين يسرقونا وشافطين البلد في جيوبهم شركات
وميد إنفستمنت
وهيرمس
وتجارة سلاح بنص الدستور
توضيح للنقطه دي
مبارك إستصدر منذ بداية حكمه تفويض من مجلس الشعب بأن يكون وسيط الدوله في صفقات السلاح بالأنواع والكميات والأسعار التي تروق له
يعني البلد بتاعتهم
والآثار بتاعتهم
ولأنهم مسلمين
أيوه صايمين رمضان كمان
فا ماينفعش إنهم يعرضوا آثارهم علي الغرب والعالم إللي مش عندها دين دي
ده حتي الرسول قال

لن يدخل الجنة ديّوث

وطبعاً ديّوث دي كلمه وحشه
وما نرضاش للرئيس إنه يبقي كده ولا لأي حد من الحكومه دول الكبار بتوعنا وعلي رأي المثل إللي ما لوش كبير يشتري له كبير

وف داهيه الهرامات والعجايب والكلام الفاضي ده
ده إللي ما لوش خير في النظام ما لوش خير في العجايب
عجايب

العيب إن الشائعات بتطلع كدب

والله يا أخي الشعب المصري ده شعب إبن حلال علشان ما ينفعش أقول المعني التاني الذي يقصد به المكر والدهاء
مش علشان إحنا ف رمضان لكن علشان أنا محترم
الشعب ده رغم إنه عبقري في التكيف وتسيير الأمور
إلا إنه ساعات بيحتال علي كده علشان يفضفض
ولو إن ده مبيحصلش كتير إلا إنه بيحصل
كل ده طبعاً بخصوص الشائعه إللي طلعت فجأة وضربت كل الأرقام القياسيه ودخلت موسوعة جينيس للأرقام القياسيه
بجد مش تهريج
أنا عن نفسي باقيس مدي قوة الأخبار وإنتشارها علي مقياس مختر
لأ مش رختر
ده تعديل بين الجهاز ومعاه تدخيله لكلمة ماما أو أول حروفها
أصل أنا ماما مدمنة إعلام رسمي
وده مش بمزاجها لأن إحنا ما عندناش دش
مش مهم هاشيلكم الهم ليه أنا مش بقول كده علشان تلمولي وتجيبولي دش
بس المهم بما إن الموضوع كده فهي مش بتسمع غير الأخبار إللي النظام عايزنا نسمعها
وعليه فإن أي شائعه تصل إلي منزلنا أو اية أخبار تلج من بابه عبر مصدر غيري فهي بالتأكيد أخبار قويه وشائعات تحمل إحتمالات الصحه
وده إللي حصل مع الشائعه بنت الكلب إللي عشمتني بالحلق خرّمت أنا نظامي
المهم إن الشائعه دي إحدي إبداعات شعب عبقري يقاوم عبر الموبايل وفي أحلامه وجلسات النميمه
البوست طبعاً مش سببه الشائعه لوحدها أو هي المبعث الوحيد لأن أنا إتكلمت فيها قبل كده وكمان الناس بطّلت كلام فيها وقدمت
لكنها بتطرح نفسها عبر آليات وأشكال أخري تجبرنا علي إعادة الحديث عنها
مثلاً محاكمة رؤساء تحرير أربع صحف
لكن الأهم والأدهي هي المقارنه ةإللي أنا باكتب البوست ده علشانها
بداية النظام المصري بيسوّق نفسه لينا وللخارج علي إنه نظام ديمقراطي
مش هاعارض وهاعتبر إن أنا نايم أو مسافر ومش في البلد
في المقابل وعلي جانب آخر
هانلاقي نظام زي النظام الكوبي مابيسوقش نفسه علي إنه ديمقراطي ولازفت
ولو سوّق بيعترف إنه نظام ديكتاتوري وشمولي
وتقريباً هو النظام الأول أو الأوحد في العالم الذي يتمسك بالإشتراكيه والشيوعيه علي مستوي الأقوال والنظريات كما لم ينظر لها ماركس أو هيجل وكما لم يحلم بها لينين أو ستالين
وطبعاً مابيخفيش نواياه في مسائل تانيه مهمه يعني راؤول كاسترو أخو الرئيس فيدل كاسترو بثيحكم معاه في حضوره وبيحكم لوحده في غيابه علني ومن غير مواربه أو خداع
وكاسترو نفسه هو أقدم حاكم علي وجه البسيطه برصيد 48 سنه حكم
طبعاً أنا مش بحب كاسترو لكن باتعترف إني مش باكرهه يعني محايد معاه وسبب ده الوحيد إنه كان صديق جيفارا
لكن كاسترو إللي ضرب مبارك صاحب الشائعه المصريه في العمر وفي مدة الحكم أب ألا يضربه في شائعة مرضه لأنه لا يصح أن يتميز عيل من سن أولاده علي كراسي الحكم عليه في شئ
فخرجت شائعه في الأسبوع الماضي تنال من حالة كاسترو الصحيه
وهو أمر في مجمله ومظهره ليس بجديد فهي عادة كاسترو في ظل ظروفه الصحيه المتقلبه لكن الشائعات في هذه المره كانت قويه
السبق الذي جعلني فخراً أكتب هذا البوست هو أن كاسترو لم يحتمل مثل المبارك محمد حسني مبارك وخرج يعلن علي الملأ عبر شاشات التلفاز_ حاوه التلفاز دي _ نبأ كذب الشائعه وأن حالته الصحيه بخير
وهو ما قدر علي عكسه رئيسنا الهمام إبن الحلال علشان أنا بردوا محترم
فصبر وعاند وقاوم وجاهد وأحرز قصد السبق
نقطة التميز الأخيره لنا أن الجرائد الكوبيه الفلاتيه قليلة الأدب إللي إتناولت الموضوع مالقيتش حد\ يلمها ويكسر عينها وما حدش قدر يكلمها أو يحول رؤساء تحريرها للمحاكمه لأن النظام هناك خرع وسايب مش زي نظامنا إللي عرف يلمهم ويوقفهم عند حدهم
كله إلا قلة الأدب
إحنا بلد شرقي مسلم
لا إحنا شيوعيين ولا بتوع سيجار وبنات حلوه وبجاحه وتطاول
ثم إيه إللي أنا بقوله ده
ومين فيدل كاسترو
إيش جاب لجاب
فيدل يبقي زي مبارك
فشر
ده إحنا عندنا رئيس جبلّه مفيش زيه إتنين
مصر تبقي زي كوبا
بلا قرف
دي هيا أم الدنيا مصر
هيا وردة كل عصر
عصر الليمون والبرتقان والبني آدمين ورؤساء التحرير
ده أنا حتي سمعت إن راؤل كاسترو زهق من الحكم ومن أخوه إللي مش عايز يموت علشان يورث هو الحكم فقال قولته الخالده
لولم أكن كوبياً لوددت أن أكون مصرياً
عرفت إزّاي إن إحنا أحسن وليّا حق أتباهي وأكتب البوست ده
صح وإلا لأ؟

روحانيات رمضان

أنا جيّ حماك عشمان شاكي
والدمع مغرّق شبّاكي
لو كلي ذنوب أنا جيّ أتوب
إرحم مغلوب جالك باكي



أنا جيّ حماك عشمان شاكي




أنا ياما خدتني دروب منك
لكن مانسيتش ف يوم إنك
موجود لو أعود وأسأل عنّك
مكشوفلك عندي وأملاكي






أنا جيّ حماك عشمان شاكي





ندمان علي جهلي ومتأثّر
وباشوف المؤمن باتحسّر
لو كان العمر بيتأخّر
ياملايكه... كنت أبقي معاكي





أنا جيّ حماك عشمان شايكي







من ساسي لراسي غريق ضايع
تهت وضلّيت لكن راجع
ويّاكي يارهبه بقيت طايع
وعساكي تردّيني عساكي






أنا جيّ حماك عشمان شاكي








عبّيت من دمعي بحور فضّه
وخلعت ذنوبي وباتوضّا
عارفك هاتسامح وهاترضي
ياعنيا ما هايخيبش رجاكي






أنا جيّ حماك عشمان شاكي







يابيبان مفتوحه وما بتخلي
وكفوف معقوده وناس داخله
مش طالب غير ضلّة نخله
ده القلب ياجنّه إتمنّاكي






أنا جيّ حماك عشمان شاكي

الثلاثاء، 11 سبتمبر 2007

رمضان كريم...... ع الشعب بس

كل سنه وكل بني آدم علي وجه الكره الأرضيه البيضاوية الشكل والمنبعجه من عند القطبين وهو بخير مسلم أو مسيحي أو بوذي أو زرادشتي أو هندوسي أو حتي نبي جديد ما نعرفهوش
المناسبه دي إللي أنا باهني بيها كل الناس وأكيد حد من بتوع الإسلام هو الحل ولا حل غير الإسلام هايعتبر إن أنا من ضمن المنافقين وإلا حاجه مش مهم وما علينا
أنا شايف إنها مناسبه إنسانيه أكتر منها
مناسبه دينيه
وشايف كمان إن ربنا وهو طبعاً إللي أعلم إنه كان يقصد بيها كده
يعني يقصد إنها مناسبه إنسانيه مش دينيه أو إنسانيه أكتر علشان أتجنب الإخوه إللي عقولهم أد خرم الإبره
علي فكره أنا بكتي البوست ده قبل المغرب والنهارده الرؤيه
ومش باكتبه من البيت بس إعمالاً للمشاركه الإنسانيه من البدايه أنا باكتبه من نادي تكنولوجيا في قصر ثقافه
مش هاقول إسمه علشان ماخدتش منه الإذن أحسن يزعل بس هو مش في الفيوم ولا شكله هرم مقلوب ولا حاجه
المهم
إن أنا ماكتبتش البوست ده علشان أهني وبس
ملحوظه:
وأنا باكتب سامع أغنية رمضان جانا وطلب ملعلع بصوت عالي مش عارف طالعه في البوست وإلا لأ
إنتهت الملحوظه
السؤال إللي حبيت أخبيه بخبث وسط بوست التهنئه الحلو ده يتعلق بالمقدمه إللي قولتها من إن رمضان في إعتقادي مناسبه إنسانيه أكتر منها دينيه
لأن الجوع مابيفرقش بين مسلم ومسيحي ويهودي وملحد
طيب الرئيس مبارك ونظامه بيفرق ليه
لأنهم مفتقدين الإنسانيه
وإلا مفتقدين الإسلام لا سمح الله ؟
جمله إعتراضيه
قبل ما حد ينطق ويقل أدبه أنا مش باحاكم حد وهما حرين هما وربنا
بس أنا بافضفض ومن حقي
إنتهت الجمله الإعتراضيه
مناسبة السؤال إيه ؟
أقولك
أنا يعني ما بشوفش النظام ده حاسس بحد ولا بيبان عليهم في رمضان حتي شكل الجوع
الله أعلم إن كانوا بيصوموا وإلا لأ أنا مش هاحاسبهم
بس إذا بليتم فاستتروا
والنظام ده بجح لا بيستتر ولا نيله
عامل زي سواقين الميكروباص
تلاقي الواحد منهم نطع وماسك سيجاره في نهار رمضان ولا معبر أهل إللي جابونا ومتخيل إنه بيتحدانا إحنا
وإلا إننا جبلات مثلاً ومش فارق معانا
مع إنه ممكن ساعتها الواحد يتهور ويطلع عليه مفعول السجالير ويعمل معاهم زي أمناء الشرطه وف داهيه يوم صيام
بس الظاهر إن هما مصممين ومش حاطين حاجه زي كده في دماغهم
يعني شكلهم من الأساس مش واقفه معاهم علي سيجارة سواقين الميكروباص
ولولا إن كلهم من إلالي رجلك والقبر كنت قلت إنهم بيسترجلوا بالنهار
مش قصدي علي نسوانهم
لأن هما بيعملوا كده فعلاً علينا نهار وليل
والغريب يا أخي إن إنت لا بتشوفهم في إحتفال ولا في إفطار جماعي زي العيل الصغير إللي مش بييصوم وييجي ساعة الفطار يقعد يتفرج علي إللي بياكلوا
وزتلاقيهم كمان مقاطعين الجوامع مثلاً شاطر مبارك بس يشد علي شرم الشيخ عشية العيد علشان يصلي علي البحر قال يعني صلاة الخلا سنه
وطبعاً إللي قاله إن الخلا يبقي شرم الشيخ هو طنطاوي علشان يتفسح شويه بعيد عن الأزهر
نظام غريب وماعندوش ريحة الدم واتلدين والحيا والخشا
قبل ما حد قاريله كلمتين في الدين
يقول إن الإسلام بيرخص لمبارك وعصابته الفطار في رمضان والكفاره علشان سنهم
طيب لما ربنا بيشفق علي العواجيز من الصيام لا يوديهم في داهيه وهما ما يستحملوش طب ليه هما مش بيشفقوا علي نفسهم ويرحمونا
ثم إن الكفاره لغوياً مش معناها إنهم يكفرونا ويكرهونا في البلد دي
فين المساكين إللي بيطعموهم دول هما إللي خلوا أكتر من نص الشعب مساكين وكمان مش سايبينلهم الحسنه إللي بتيجي من برا تعدي لحد مكاتوصلهم بيعتبروا إن هما مساكين أكتر منا وبيفتحوا كروشهم
يعني من الآخر لا صيام ولا رخصه بالفطار والله أعلم هما كده محسوبين علي أي فريق
ومن حقي أهني الناس كلها إلا هما علي الأقل يبقي في دايره واحده في البلد دي هما براها
كل سنه ونتوا طيبين يا غلابه وبس
وأي حد من الحكومه أو من الحزب الوطني ربنا يجعلهولوا ىخر رمضان
ويجعلهالنا آخر الأحزان
ورمضان كريم
مع الشعب بس
النظام لأ

السبت، 8 سبتمبر 2007

مهرجان القراءه للجميع ... حتي الوليه بتقرطس البلد

لا أحد سواء أكان منصفاً أو متجنياً يمكنه إنكار أن مشروع القراءه للجميع دون تحيز وتحزب وكره وتعصب هو بحق مشروع جيد وخطوه مهمه لإفاقة شعب كان يقرأ وأضحي الأن جاهلاً لا يعرف للكتاب قيمه أو بالأحري لا يجد القيمه التي يدفعها مقابل قيمة الكتاب
والمشروع وفر المكتبات التي جعلت الكتاب في متناول الجميع للقراءه والإطلاع ثم مالبث أن إنبسق عتنه مشروع مكتبة الأسره الذي بدأ في نشر عناوين مهمه وتدعيمها ليستطيع الجميع علي إختلاف مستوياتهم الإجتماعيه شراء هذا الكتاب
إلي هنا فالموضوع مقبول وجميل ولا غبار عليه
كما أنني لا أتخذ موقفاً من المشروعات الهادفه للتجميل والتلميع وتحسين الصوره
فكثير من المشروعات لا تتعامل معنا من الأساس وأستخدمت للتلميع رغم أنها مشروعات فاسده وفاشله وهادره للمال العام
وليس ببعيد مشروع توشكي الذي أهدر عشرات المليارات لتلميع السيد الرئيس ( تلميع مش معناها إنه جزمه باهته وجربانه وإلا حاجه )
ومن حق السيده قرينة السيد أن تسعي لتحسين صورتها وتخليد إسمها حتي لا تأتني بعدها من تمحيه8 مثلما فعلت هي مع جيهان السادات التي كانت تملأ الدنيا صخباً وضجيجاً وتقبل الرئيس الأمريكي جيمي كارتر في حضور زوجها الرئيس المسلم لدوله مسلمه
ما علينا
المهم أن السيد الفاضله ماما سوزان
( رغم إن أمي لسه ما كملتش الستين وهيا بسم الله ماشاء الله سبعين سنه)
ماعلينا بردوا
الست الفاضله والله أعلم بانيات أقامت مشروعاً جميلاً
طموحاً لتلميعها ووجاهتها وتجميل صورتها ولا إعتراض
أقامت المشروع عبر جمعيتها المسماه بجمعية الرعايه المتكامله
إللي عملتها لما العيال كبرت ( لأ مش مسرحية سعيد صالح ) ولقيت إن الراجل طول النهار مربوط في ساقية مصر زي التور البلدي والعيال في شركاتهم ومشاريعهم إللي ورثوها عن جدهم ثابت باشا وجدهم حسني إبراهيم السيد مبارك لاظ أوغلو
طب تعمل غيه تقعد زي قرد قطع طول النهار تعمل جمعيه ومجلس قومي للمرأه وتلملها شوية مقاطيع
( مش قصدي فرخنده حسن وإللي معاها)
ماعلينا بردوا لحد كده كويس وهيا حره بلد جوزها وعيالها وبتسلي نفسها
الوليه حبت توسع من نشاطها وتشتغل علي ميه بيضا علشان تاخد شوية جوايز ولا مانع من العمل من أجل نوبل للسلام علشان تبقي راسها براس السادات وعدت جوزها وجيهان
مفيش مشكله
المشكله كلها في التنفيذ
السيده التي رأت أن يتم هذا المشروع عبر جمعية الرعايه المتكامله وتحت إسمها
إستغلت أنها السيده الأولي وفرضت علي مكتبات المدارس والجامعات وقصور وفروع الثقافه العمل معها
وأنا لست ضد هذا ولكن لا يتم إحتكار الأسم والميزانيه
فتخيل أن عمل هذه الجهات يتم من ميزانياتها الخاصه بما له من تأثير علي توقف أنشطه أخري مهمه
وبسؤال بعض مشرفي الإدارات الثقافيه ومديري الفروع قالوا أن هذه أوامر عليا للعمل بأموال أنشتطتنا لصالح نشاط زوجة الرئيس
والتناقض في أنه في ظل هذا التضييق والإقتار نجد أن ميزانية ملصقات ودعاية المشروع حوالي 22 مليون جنيه
ولكن النشاط نفسه لا شئ وحتي لاغ أكون متجنياً أقول لكم ماحدث معنا شخصياً
فقد تمت دعوتنا لأمسيه في مقر جمعية الرعاية المتكامله المركزيه بمصر الجديده
وكان من شروط تلبية الدعوه أن نذهب علي نفقتنا أو نفقة فرعنا الثقافي وهو ما حدث
ونفس هذا التهريج الذي يحدث في مهرجان القراءه للجميع هو ما يحدث في مشروع مكتبة الأسره لنجد مشاركه إجبتاريه للوزارات المختلفه ومع طباعة العناوين المختارهع من قبل الداخليه والمسموح بها أمنياً
نجد أنهم يفرضون علي هذه الجهات أن تح-مل تلال الكتب صاحبة العناوين غير المرغوبه لنجد مكتبة مدرسه إبتدائي بها كتب من عينة الزمان الوجودي لعبد الرحمن بدوي أو المسرح الشعبي لعلي الراعي
وغيرها من العناوين التي لن يفهما مدرسوا هذه المدارس لا طلبتها
المشروع كفكره لا بأس به وهي فكره محموده
لكن التنفيذ لم يخرج عن المعهود من حزب ونظام السيد الرئيس رغم أنه ليس هو القائم به
ولكنها نفس الطريقه وأعتقد أن السيد الرئيس من طول العشره قد بهت علي زوجته
فأصبحت تستعبط الشعب والوزراء وتقرطس الجميع
وصدق المثل من عاشر القوم أربعين يوم يا صار منهم يا صاروا منه
ودي إيه مش أربعين يوم
دي خمسين سنه
يالا حسن الختام

المشاعر الساخنه في مواجهة جمال الساخن

الجميع بلا مقدمات مطوله ودون لت وعجن
يعرف أن الخامس من سبتمبر عام 2005 هو تاريخ محرقة بني سويف التي راح ضحيتها 47 من خيرة شباب وفناني المسرح المصري
والجميع يعلم أيضاً أن رد الفعل الرسمي لم يأت علي مستوي فقد عشرات الأرواح بغض النظر عن كونهم مثقفين أو مبدعين فالإنسان هو الإنسان أياً كان وضعه وموقعه
ليست المناسبه لهذا الموضوع هو تجاهل اتلدوله بشكل شبه كامل لذكري هذه الكارثه
ولا في إقامة مهرجان المسرح التجريبي بالتزامن مع ذكراها الأليمه ووقوف السيد وزير الصفاقه يهز طوله ويبتسم كالعاهرات فرحاً ومنتشياً بنشاط وزارته الثقافي غير المعهود رغمخ أن رجله الأول وذراعه الأيمن سقط منذ أيام قلائل في قضية فساد كبري
ليست مناسسبة الموضوع الحديث عن فساد يعلمه القاتصي والداني وتجاهل من وزارة الثقافه لأبنائها الذين يحملون علي عاتقهم مسئوليتها ومسئولية أنشتطها
لا مجال للحديث عن مساؤي هذاى الكيان المترهل ووزيره الفاسد المفسد
مدعي الفن وتاجر الأثار والمنحرف علي كل المستويات فنياً ومالياً وإدارياً وجنسياً
المناسبه هي أن التجاهل أصبحت تتداخل فيه جهات أخري وتخدم علي الفساد والإفساد والتشويه المتعمد لفنانين رحلوا عن دنيانا
المناسبه ياساده وحتي أضع حداً لهذه المقدمه
هي قيام وزارة الإعلام بدور المساعد لوزارة الثقافه في تجاهلها وتنصلها من مسئوليتها عن أرواح الذين راحوا
والمستفز أن هذا حدث عبر قناة النيل الثقافيه التي بفعل المنطق والواقع بينها وبين الحركه الثقافيه والمسرحيه المصريه أواصر ربما تكون أقوي من بعض جهات وزارة الثقافه
وعبر رئيس القناه المتشاعر إسماً وفعلاً
السيد جمال الشاعر بأي شئ في معدته أو أمعائه إلا الشعر
رأي أن يفسد علي أهالي الشهداء فرحتهم بحفل التأبين الصغير الذي قررت الهيئه أن تقيمه لهم في محافظة الفيوم عاصمة الإنكسار الأكبر لهذا الحادث
لأنها راح منها وحدها 22 من خيرة ابنائها وفنانيها
ككيف يفسد الأخ جمال هذا الحدث لابد أن يعكنن علينا بشخص ذا ذكري سيئه مع الناس عبر هذا الحادث
وهل هناك أسوأ معني ومبني وذكري من مصطفي علوي رئيس هيئة قصور الثقافه وقت الحادث ليطل علي الناس في برنامج رئيس قناة النيل الثقافيه عشية يوم حفل التأبين
ليجلس كالأسد المغوار يعلن بشجاعه أنه غير مسئول وأنها مسئولية المخرج الذي راح في الحادث وينجلي وينجعص جمال المتشاعر وهو يعلن تبرئته ويبارك له عليها
أنا بشكل شخصي ربما أفهم دافع هذا
وأود بهذه الكتابه أن أفسره وأعلنه أكثر من كوني أتسائل عنه
السيد وزير الإعلام أنس الفقي كان رئيساً سابقاً فاشلاً وفاسداً ومفسداً لهيئة قصور الثقافه وكان دلدولاً للسيد ناقص الدلدول وزير الصفاقه
وأعتبر أنه حتي الآن يأخذ أغلب أوامره من الوزير لأنه يدين له بفضل تصعيده للتشكيل الوزاري رغم أن تصعيده جاء بضغوط من فاروق حسني بعد تصاعد نفوذ لجنة السياسات وخوف فاروق من تصعيد الفقي بدلاً منه
والدليل أنه كان تصعيداً لا أكثر أن الفقي لم يجدوا له وزاره تستوعبه فأخذ يتنقل بين الشباب والإعلام
كما أن الفقي زميل لمصطفي علوي في لجنة السياسات ويخدم عليه وعلي تبرئته لصالح سمعة الحرس الجديد بأكمله
ولكن مع هذه المبررات لجميع الأطرافق ما هو مبرر السيد المتشاعر جمال الشاعر ليتحدي مشاعر الناس ويتحدي الثابت باتلعقل والمنطق وإن زوره القانون من مسئولية علوي وفاروق حسني ونظيف بل ومبارك نفسه عن أرواح ضحايا بني سويف
أعتقد أن جمال الشاعر يسعي لتقديم أكبر تنازلات مثلما فعل وزيره المبجل ليحصد مقعد في الوزاره
لكن السؤال علي جثث من سيكون هذا المقعد؟
لنا الله من علوي وحسني والفقي والمتشاعر صاحب الثقافيه ومالكها
ومن زعيم العصابه المنوفي إبن ستين.....ك

الأربعاء، 5 سبتمبر 2007

نجم سفير الفقرا طب بأمارة إيه

في الأول كده أنا أود أتن أسجل تقديري لنوّاره نجم ولعم أحمد فؤاد نجم نفسه بصفته شاعراً وأستاذاً تعلمت منه وتعلم منه غير يالكثيرين
وأود أن أرفع بهذه المقدمه أي حرج
فمع التقدير فأنا أؤمن أنه لا أحد عصي علي النقض والمناقشه وليس هناك ثمة تابوهات علي أي مستوي من المستويات
عم أحمد فؤاد نجم شاعر كبير ومناضل أكبر في عصري عبد الناصر والسادات
كتب وقاوم وعارض وأعتقل
لكن أحمد فؤاد نجم القرن الواحد والعشرين يختلف عنه في القرن العشرين
نجم زميل الكفاح للشيخ إمام عيسي وزميل المعتقل لكل شرفاء ومناضلي مصري
عرف من أين تؤكل الكتف
وبدأ في تصدير معارضه علي مقاس الحزب الوطني ولجنة سياساته ورجال اعماله
كان نجم مناضلاً والآن أصبح بشكل أو بآخر مشاركاً في الظروف الحاليه إما بالتكسب من ورائها ومن وراء الرجال المتكسبين منها وإما بالصمت الذي أراحه وأراحهم
صحيح ولا مراء أن نجم مازال يسكن فوق السطوح وفي منطقه شعبيه جداً
إلا أنه ليس فقيراً ولا يعرف الفقراء الآن ربما كان هذا سابقاً
أما الآن فنجم هو أحد رجال الطبقه المستغله وإن لم يكن هو بذاته مستغلاً فإنه يجني المكاسب من إستغلالهم
صحيح أنه رفض شقة نجيب ساويرس بالمهندسين
إلا أنه قبل صداقته وصحبته وموافقته ومجالسته وهداياه وأعياد الميلاد التي يقيمها له وتتكلف عشرات الألوف من الجنيهات
وهو ما يشي دون أدني محاوله للي عنق الحقيقه أو التحاذق أن نجم يمتلك الآن أضعاف هذه الألوف التي تصرف علي أعياد ميلاده التي مر منها أكثر من سبعون عيداً لم تقام
نجم أصبح الآن نجماً بحق وبعد أن كان محاصراً أمنياً أصبحت تفتح الأبواب في وجهه بسهوله ويسر
أذكر أننا في أواخر تسعينات القرن الماضي حاولنا إستضافته في أمسيبه شعريه ولكن الأمن إعترض بشده وأوقف الموضوع
أما الأتن فنجم ضيف دائم علي شاشات الفضائيات المصريه والعربيه
يكتي أغاني المسلسلات ويقبض الألوف بعد أن كان يكتب أغنيات الشيخ إمام جهاداً ومقاومه وخحباً في مصر والشعب
أصبح ضيفاً علي التليفزيزن المصري عبر مسلسلاته وبرامجه بعد أن كان مفروضاً عليه الحصار في الراديو والصحف القوميه
نجم شاعر كبير وتاريخ مشرف لا يمحي وكان فقيراً ويدافع عن الفقراء
أما الأن فنجم ليس فقيراً ولا يعرف الفقراء ومصالحه قائمه مع من يمصون دماء الفقراء
لا أعتقد أن نجم القرن الفائت لو رأي نجم الأن كان رضي عنه بأي شكل وبأي حال من الأحوال
ودعك من تصدير التضليلات والأوهام
فليست شجاعة نجم ومقاومته التي عهدناها عبر سنين طويله هي أن يرفع صوته في برنامج علي الهواء أو أن يسب الدين أو الديك أو ان يستخدم ألفاظ نابيه
هي محاوله لخداع الناس وإيهامهم أنه مازال معارضاً بنفس المنطق الذي تستخدمه الحكومه ورجالها ورجال أعمالها
ليس منا كفقراء
ولا يعبر عنا بأي شكل من الأشكال
هو من طبقة الأغنياء والمستفيدين من فقرنا وإضعافنا
هو من مجموعة ساويرس وأبو العينين
رحم الله رفيق الكفاح الشيخ إمام عيسي
ورحم الله نجم المناضل والثائر
وليهدي الله نجم المهادن والمصالح
وعذراً لنوّاره التي أقدرها وأجلها وأحبها رغم عدم معرفتي الشخصيه بها

وعذراً لعمي وأستاذي الذي يصعب علي أن أراه في هوّه كان هو أول منتقديها ومعارضيها
وربنا يرجعلنا نجم بتاعنا مش بتاع رجال الأعمال

الثلاثاء، 4 سبتمبر 2007

مبارك ماااااات ؟ طيب في داهيه

طبعاً الكلام ده بدايته مش جديده ويمكن أكون أنا آخر واحد في المدوزنين إللي بيتكلم فيه
بس أنا عذري غن المدونه كانت مقفوله بقالها فتره ولسه مفتوحه بقالها يومين
والسبب الأساسي إللي خلاني أتكلم في الموضوع ده إن الكلام زاد
يعني كل الناس بقت بتتكلم في الموضوع
حتي بياعين الخضار في الشارع
والمشكله الأكبر إن إعلام الرياده لسه بيضلل الناس ومش بيديهم عقّاد نافع علي رأي الناس الغلابه بتوع بلدنا
أنا مثلاً باكلم أمي في الموضوع قالتلي إزاي مات يابني وما أعلنوش الخبر
قلتلها الله يجازيكي بالخير يا ماما
إنتي فاكره إننا ف أمريكا وإلا حتي في كوبا
إللي ماسكه في الشيوعيه بإديها وإسنانها حتي بعد إنهيارها في الإتحاد السوفيتي نفسه
لكن كل ما كاسترو يتعب الناس تعرف
الخلاف مش علي مبارك
مات في داهيه
عايز يموت ربنا يكرمه ويحققهاله أو يطلع في الشارع وهايلاقي 75 مليون بني آدم مخنوقين منه في خدمة عذرائيل
الفكره نفسها هي في التعامل مع الشعب بمنطق المختل فاقد الهليه الذي لابد أن تتم الأمور علي أكمل وجه كما يريدون ةقبل أن يعرف
أي أننا أمامهم متلقين لأوضاع وشئون ومشكلات البلد لا مشاركين ومتعاطين ومتفاعلين وطالع عين أبو إللي جابونا منها
يعني يلعبوا ويخططوا ويرتبوا في السر وغحنا إللي بندفع الفاتوره
مبارك النهارده وإلا بكره هايغور في داهيه
لكن الخوف علي مصر
بالأوضاع دي والنظام ده الموضوع خطير لأننا بلد دكتاتوريه يلعب بها فرد كيفما شاء لا بلد قواعد وقوانين ومؤسسات
وفي حالة الغياب المفاجئ لهذا الفرد يبقي قول علي البلد والنظام والحال وكل حاجه ألف سلامه
والمشكله بردوا مش في وجود مبارك
لأن بعض الناس حسبتها كده وأول ما سمعت الإشاعه قعدت تضحك وتدعي إنه9ا تكون بجد
ولما دعيت أنا إنها تطلع كدب إتهموني بالعماله للنظام وإني باقبض من لاظوغلي
طيب ياناس باقبض إزاي وأنا باشتري السجاير فرط وقاعد 18 ساعه في اليوم علي القهوه
المشكله مش في مبارك يا جماعه بس مين يسمع
المشكله في المنظومه الحاكمه
في مؤسسة الحكم التي ليست هي مبارك ولكنه النظام الذي ورثه مبارك عن سلفيه ناصر والسادات وسيورثه لخلفه أياً كان
الأفراد لا يصنعون مشكله أمام التغيير ولا يشكلون عقبه في طريق مستقبل هذا البلد
لكن المنظومه التي تحكم الأفراد قبل أن يحكموها وتجبرهم أن يسيروا وفقها لإعتبارات المصالح والتحالفات وموازين القوي
سيذهب مبارك بالتأكيد فهو لن يخلد
ولن يأتي مبارك الإبن أيضاً فابتأكيد أننا لسنا تركة العائله المصونه
لكن سيأتي مبارك آخر أسسوأ من الأب والإبن
لأنها منظومه كامله في ذاتها ومكتمله بنفسها ولا نشكل لها نحن الشعب أي مصدر ضغط لأننا عبيد الأرض وملحها نحن آلة الإنتاج أما هم المنتجون الحقيقيون
ليذهب مبارك إلي الجحيم إن كان هذا يرضي المصريين
وليتبعه ولداه وزوجته إلي أسوأ ركن في جهنم
ولكن قضيتنا وخلافنا ليس مع عائلة مبارك
هي مع المنظومه التي أفرزته وقادره علي أن تفرز ألف مبارك آخرين
المنظومه التي طالما أفرزت عثمان أحمد عثمان وحسب الله الكفراوي ومحمد أبو العينين وأحمد
عز ونجيب ساويرس وأحمد بهجت
وقادره علي أن تفرز غيرهم الكثير
خلافنا مع عائلة مبارك نعم كما تقولون ولكن في جزء منه
ولكن الجزء الأكبر مع كلاب هذه العائله وأتباعها ومحلليها لزواج فاسد بالشعب المصري
مع الشاذلي والشريف وشهاب وعزمي وممدوح مرعي وحبيب العادلي والبنت البكر المسماه بوزير الدفاع الذي لا يجد إلا النظر لموضع قدمه وكأن حذاء مبارك هو عمله ومهنته في هذه البلد
لنفق إن أردنا أن نتعرف بحق علي قضيتنا ومشكلتنا ونتحرك بخطي سريعه نحو مستقبل نحن أهل به
مات مبارك
ماذا بعد؟
أو لم يمت مبارك
أيضاً ماذا بعد؟
لا تبني المواقف علي أفراد لأننا باتأكيد سنواجه ونفاجأ بأفراد آخرين قد يكونون أقوي وأشرس وذوي طموحات تفوق السابقين وتفوق جمال وعلاء والفاضله صاحبة جمعية الرعايه المتكامله
مش عارف إحنا بننفخ في قربه مقطوعه
شعب بارد متبلد ميت
يا خسارة كلامنا وحبسة إبراهيم عيسي وأيمن نور وغيرهم
ده أنا قربت أكفر بسبب البلد دي
والله إسرائيل أرحم
هاهاجر

كلنا إبراهيم عيسي

أولاً وفي البدايه وعلي بلاطه كده أحب أعرّف الناس قبل ما تلعب علي لسان حد منهم لمه قليلة الأدب وإلا يقول إني من محترفي الشعارات والمتاجره بالمواقف
أحب أعرف الجميع إني مش من أنصار البطولات والزعامات ومش بحبها ولا من هواة الإلتفاف حول زعيم وقائد يرفع الرايه ويعلي الكلمه
لكن الموضوع مهم ومحتاج وقفه
مش علشان إبراهيم عيسي
إللي أحب أعترف إني بحبه جداً كشخص بغض النظر عن المستوي أو القواعد المهنيه
لن إبراهيم عيسي إنسان دمث ومحترم وأخلاقه عاليه
ممكن نختلف مع الدستور بس مش هانختلف عليها
ممكن نختلف مع عيسي بس مش هانختلف عليه
إبراهيم عيسي بردوا وعلشان مانضخمش الأمور ماكانش مستهدف من الأمن رغم إن في سوابق مع المن وقضايا قبل كده
مش عايزين الأمور تكبر ولا نصنع بطولات أنا واثق إن صاحبها نفسه مستغني عنها
إبراهيم عيسي وطني يسجل مواقف بدافع الحب لمصر والعمل علي المصلحه المصريه
لكن إبراهيم عيسي مش خطر علي النظام والأمن علشان يستهدفوا بس للأسف الأمن المصر يإللي غبي ونصه إن ما كانش كله بهايم
وأنا طبعاً بما إننا إتكلمنا عن إبراهيم عيسي وتحويله لمحكمة أمن الدوله بتهمة إثارة البلبله وإشاعة أخبار كاذبه إللي هيا أخبار موت الزعيم القائد الحكيم الملهم العبقري الفذ إنشالله محمد حسنس مبارك غير المبارك
الخبر بغض النظر عن مدي صدقه أو كذبه
وبغض النظر عن كون الدستور عرضته أو تساءلت عنه
إلا أن السؤال المهم ما هي المشكله بالأساس
من حق أي شخص أن يعبر بأي طريقه وكيفما يشاء وينشر ما يريد من أخبار وعلي الطرف المتضرر أن يثبت العكس ثم يقاضي الناشر إذا كان قد وقع عليه ضرر من جراء هذه الأخبار التي سيكون قد ثبت كذبها
أما الأن فنحن بصدد أخبار لا نعرف مدي صدقها من عدمه كما انه ليس هناك أحد قد تضرر من هذه الأخبار
هو ليس إستهداف للدستور ولا لإبراهيم عيسي
وأختلف أيضاً مكع نوّاره نجم التي فسّرت الموضوع بأن الأمن هو من روج هذه الشائعه ليقيس الرأي العام ويضرب بها بعض المعارضين
والموضوع من وجهة نظري ليس بهذه البساطه
والأمن المصري في ظل القوانين المصريه المعيبه ورجال القضاء المضغوطين أغلبهم والمتعاونين منهم مع السلطه التنفيذيه وعلي رأسهم السيد مرعي الو ( زير ) فإن الأمن ليس في إحتياج لأن يلعب هذه اللعبه كي يقيس الرأي أو يوقع بالمستهدفين
وإعمالاً للمنطق وحتي لا نخدع أنفسنا أحب أن أقول أن الكلام هو غاية المراد في هذه البلد
تكلم دون أن تفعل لن يتعرّض لك الأمن
وأذكر أننا في أمسياتنا الخارجيه نقول قصائد شديدة اللهجه في حق الرئيس والوزراء تصل إلي حد السب الذي يعاقب عليه القانون في وجود ضباط أمن الدوله
الكلمه في مصر ومع الشعب المصري ليست وسيله للتغيير ولا مكمن للخوف
الشعب المصري شعب متبلد ميت العواطف والشعور والأحاسيس لا يتحرك وإن وقع فوق رأسه جبل أحد لا بضع صفحات من التنفيس تكتب تحت إسم الدستور أو العربي الناصري أو الفجر أو صوت الأمه أو الأسبوع
يكون ورائها معارضه حقيقيه في القليل وفي الغالب تكون مدفوعه من الأمن ذاته مثل الأساتذه عادل حموده ومصطفي بكري
ليس إستهداف إذن من وجهة نظري
ولكن هذا يطرح حاله من التخبط تتفشي هذه الأيام في اوساط الأمن والدوائر الرسميه بعد إختفاء مبارك لا أعاده الله
وتوزيعات الخدمات في وزارة الداخليه وضغط العمل في الأيام الأخيره خير شاهد علي ذلك
ورغم كل هذا إلا أنني أعترض علي إحالة إبراهيم عيسي لنيابة أمن الدوله
رغم إختلافي الجزئي مع الآداء المهني للدستور ورغم قناعتي بأنه ليس مستهدفاً
وبإن الدستور حاله من التنفيس تخدم النظام بأقل ما تهدده

أنا أتضامن مع عيسي لوجه الحق والحريه
ولنتضامن جميعاً مع عيسي لأنه إنسان ذو خلق ويعمل لا لشئ إلا الأمانه والضمير
ومصر
تضامننا مع عيسي هو تضامن مع مصر في محنتها
وكلنا إبراهيم عيسي

سلام مربَّع

سلام مربع
أو مدوّر
للي دوّر
في البلدي علي الأماني
سلام مربّع للأماني
وجمهورية كاني ماني
ولنظامها البرلماني
ســـــــــــــــلام مربّع
للكبير إللي استربّع
فوق دماغ مشش وصدّع
من كلام عمال بيرسم
دنيا حلوه في الأغاني
سلام مربّع للأغاني
كلام وداير ع الصواني
كلام وماشي في ديل كلام
ولحن تايه في الزحام
غنّا النظام علشان ننام
علي صوته نمنا ما قمنا تاني
سلام مربع للي ناموا ما قاموا تاني
إللي طافوا
وإللي خافوا
وإللي شد عليه لحافه
وغمّي عينه عن إللي شافه
وراح يقدم للي كمم صوتنا
ولإبنه التهاني
سلام مربع للتهاني
ابن وز وغصب عنّا
ف نيل هوانا
سوا برضانا أو المهانه
راح يعوم
إبن حاكم يبقي حاكم
بالوفاق أو بالمحاكم
في القانون المستحيل لازم يهون
والوريث يصبح رئيس
بشكل شرعي وف ثواني
سلام مربع للثواني
تشريعات علي كيف هواهم شرّعوها
وعود قالوها وضيعوها
ولعبه بايخه اتعودوها
ناس بترضي وناس بتخضع
ناس مناها تحب تسمع
يبقي تسمع ع المزاج
خطبه تخلق ألف مصنع
خطبه تروي وخطبه تشبِع
خطبه تبني
فوق رمال الصحرا ألفات المباني
سلام مربع للمباني
باني مجد عشان طموح
مجروح جموح
ظالم أناني
إللي علّا لاجل يعلا
وإللي غنّا لاجل يغنا
وإللي لما وريده يعطش
يملا بدمانا القناني
سلام مربع للقناني
إللي عمّر وإللي دمّر
وإللي فكك وإللي سمّر
وإللي حزّر وإللي فزّر
وإللي عارض وإللي هزّر
وإللي شاف الباشا مصلح
وإللي شافه وضيع وجاني
سلام مربع للي جاني
جاني يشكي ظلم جاني
شئ يحزّن
لما صاحب الحق يشحت
لما لون الصدق يبهت
لما يصبح في البلد دي
الشمال زي اليمين
شئ يحزّن شئ حزين
لما نرضي ونستكين
واما يرأس طول سنين
أراجوز لعين
بشكل سافر بهلواني
قال هواني وزاد هواني
سلام مربع
للي قال انه هواني وزاد هواني
للرئيس البهلواني
للوريث المعجباني
للنظام البرلماني الكاني ماني
سلام مربع
للي قطّع وإللي ربّع
وإللي مزّع وإللي وزّع
وإللي قلّع وإللي ولّع
وإللي دلّع
وإللي شخلع في البلد دي
لاجل تبقي
صوره أفظع
للنظام الأمريكاني
سلام مربع
للنظام
المصــــــــــــــــــــــــر كانـــــــــــــــــــــي

السبت، 1 سبتمبر 2007

مصر دوله يتيمه وإحنا أيتام وتجوز علينا الحسنه

حاجه غريبة إللي بتحصل للبلد دي وفيها
مصر دي حاله فريده من اليتم والإحتياج
مش عارف ليه طول تاريخها دايماً اليتم مطبوع علي جبينها
كل ماييجي حد يمسح حزنها أو يحسسها بالأمان يروح ببلاش لأن اليتم بقي حكم نهائي غير قابل للنقض
من زمان
من أيام الفراعنه والفقد هو السمه الأساسيه المميزه للبلد المنكوبه دي
أخناتون إتكفر وإتنسي والكهنه المخلصين لآمون سموه ساقط تل العمارنه وتحاشوا ذكر إسمه وكأنه ضر البلد وكان ضد مصلحتها
كليوباترا طلعوها عاهره وبتاعة رجاله وهمها علي متعتها ولذتها الخاصه
أيبك وأقطاي وغيرهم صوروهم علي إنهم بتوع نسوان وإن شجر الدر كانت حاطاهم في صباعها زي الخاتم
محمد علي بقينا نفتكر فجأه إنه تاجر دخان وإنه مجرم وعمل مذبحة القلعه وإنه بس جد فاروق وفؤاد
وعياله كلهم إسماعيل أو سعيد رغم جمايلهم علي البلد دي بقوا خونه وعملا فجأه
عبد الناصر بعد ما دفع من عمره وصحته وأعصابه راح بلاش وجه بعده السادات علشان يمسح كل إللي عمله وبعده مبارك يستلم عهد التشويه وطمس إنجازات عبد الناصر وكأنه كان حقبه سوده في تاريخ البلد اليتيمه دي
وبرغم إتفاقي أو إختلافي مع كل إللي أنا ذكرت أسمائهم إلا إن الموضوع محتاج وقفه
لأن إحنا دايماً نرضي ونستسلم بالأمر الواقع من غير تفكير وكأن اليتم والفقد والحزن مكتوب علي جبين أهالينا كتاب منزل من عند الله
طبعاً كل إللي فات ده مش كلام عايم ولا مقدمه مصمته دائره في كيان مغلق
لأن ده نتج عن إحساس خاص بالفقد التام
وده بعد موت أب وأخ وصديق وأستاذ كان حاله من الحالات إللي سبق ذكرها رغم إختلاف الأدوار والمواقع لكن كان شخصاً من الذين حملوا علي عاتقهم مهمة مسح دموع هذه البلد وعدم تركها فريسه لإحساس اليتم العارم
محمد عبد المعطي
إسم عادي وموجود كتير
ممكن تلاقي ألف ألفين تلاته إسمهم محمد عبد المعطي
ممنك يكون ليك قريب أو صاحب أو جار بنفس الأسم
لكن بالتأكيد مش زي محمد عبد المعطي
بني آدم يا أخي غريب
أب وأخ وصاحب لكل إللي يعرفهم من 15 سنه لستين وسبعين
مناضل وثوري ومساند لكل الشرفاء بيحب الإخوان والوفد والتجمع وكل إللي بيقول كلمة حق في البلد دي رغم إنه مش منتمي لأي منهم
كان منتمي بشكل أكبر وأوحد لنفسه ولأصحابه وللبلد دي زي ماعرفها في أشعار حداد وجاهين وبيرم
وزي ماكتبها بعد كده في أشعاره
إشتغل في جريدة الفيوم إللي كان بيصدرها الحزب الوطني في الثمانينيات ورغم كده ما إنضمش للحزب بل إنه كان بيهاجمه في جريدته وبيشتمه بفلوسه
إشتغل في وفد الفيوم وهو برا الوفد ما جاملش ولا مدح
إتعاون مع التجمع والناصري بصراحه ووضوح ونقد لسلبيات الكيانات الحزبيه الهشه
بني آدم تتكلم معاه يبكيك علي البلد ويحسسك بالأمل في نفس الوقت
كلامه رصاص بيشق صدرك وصدر أي مصري مهموم ويحسسه إن البلد إللي إحنا سايبينها في محنتها دي تستاهل مننا أكتر من كده
وبحاسة الإستشعار العاليه إللي عنده بيحس بسرعه بإن قدرتك علي التحمل بدأت تروح وقواك بدأت تخور
ينقل علي طول علي محطة خفة الدم ويديها نكت بتفتح بمشرط الضحك نفس الجرح بس برفق وحنيه لحد ما تفضي منه صديد اليأس وقيوح الإستسلام
ضحكته مفروده علي الآخر
بني آدم شفاف لدرجه تكاد تتماهي مع العارفين والصوفيين وأولياء الله
تخيل آخر مقطع كتبه قبل ما يموت إيه



فيها إيه
لو كسّرت القلم إللي ف إيدك
وكفرت بنفسك
ولعنت العالم ميت مرّه
وطفيت الجمر الوالع جوّاك
الشبابيك
مش لاقيه لها مكان ع الشارع
والموت ..... مابيرحمش




آخر مقطع كتبه قبل مايموت بساعتين تلاته
بني آدم تحس معاه بالجرح إللي فاتح صدورنا وممرر قلوبنا
وتحس معاه بالأمل إللي مش لاقيينه في أي مكان تاني
بيكتب شعر
وبيعارض
وبيثور
وبيهاجم مبارك وإبنه والتوريث
وبيحتضن الشعراء الشباب
وبيعلم ويدل
ويلعب طاوله
ويغني
ويرقص
طفل صغير وشيخ عجوز وشاعر فارق
أعتبره بشكل شخصي لا تدخله المجامله وبناء علي أحكام نقديه أعتبرها موضوعيه إلي حد كبير وبرصيد من الإطلاع علي أشعار جيل الثمانينات في أغلبه
أن محمد عبد المعطي أشعر أبناء جيل الثمانينيات قاطبة
كتب الأغنيه والمسرح والشعر المفعم بالتجربه والفلسفه
تخلي معظم هذا الجيل المنكوب عن قصيدة التفعيله وإتجه إلي كتابة النثر كجزء يطرح بطريقه غير مباشره تخلي أغلب بل كل أبناء هذا الجيل عن القضيه برمتها والإنسياق خلف معادلات أدبيه حديثه خرجت من رحم أنظمه سياسيه لا تقيم وزناً للمشاعر الإنسانيه والقضايا الفرديه
لكن محمد عبد المعطي ظل رابضاً في موقعه مدافعاً عن قضاياه بإسلوبه وطريقته المفضله والمحببه له ولجمهوره
تراه في الأمسيات الشعريه مكتسحاً كل من يقتسم معه منصة الأمسيه
غول شعري وإعلامي وثقافي وإنساني
يبتلعك دون تفكير وتراك تسبح في محيطه الهادر دون أن يجبرك أو يدفعك هذا للتخلي عن خصوصيتك وملامحك الذاتيه
هو حاله فريده من البشر
وموته أيضاً حاله فريده من الفقد وحلقه ضمن حلاقات مسلبسل اليتم المصري المفتوح من أيام الأجداد ولازال يبتلع إلي اليوم كل من يحاول أن يكون أباً لفكر أو فعل أو وطن
هو بالتأكيد حاله من الفقد المتناهي قد ا تستشعرها معي في شخص عبد المعطي لأنك قد تكون لا تعرفه أما إن كنت تعرفه فسوف تستشعر هذه الحاله
وإن كنت لا تعرفه فسوف تستشعرها أيضاً في أبٍ مماثل ذهب ضمن حلقات المسلسل اللعين تعرفه أنت ولا أعرفه أنا
قد يكون أب أو أخ أو صديق لكن بالتأكيد كان شيئاً مهماً في حياتك الشخصيه وتمثيل للأبوه والوطنيه
اليتم قدر في هذه البلد لا محاله
وفي نفس الوقت فلا بارقة أمل بمعادلة حالة اليتم هذه لأنتنا أصبحنا في هاوية تنحدر بالبلد إللي مرحلة العقم التي أعتقد أنها لن تتمكن فيها أن تنجب أمثال من خلفوا لنا الحسره برحيلهم
يتيمة هذه البلد وأيتام نحن فيها
وتجوز علينا الحسنه

دعوة نوّاره لتميم

إسمحوا لي أن أستخدم عنوان بوست سابق لنوّاره نجم كمدخل لهذا الموضوع
البوست كانت تدعو فيه نوّاره لأن يصوت الجميع لتميم البرغوثي
في مسابقة أمير الشعراء
ولا خلاف مع نوّاره فلها الحريّه في ما تدعو إليه
ولكن التعليق والموضوع خاص بهذه المسابقه من بدايتها أو من بابها كما نقول بالعاميه
أنا في البدايه لا أفهم سر الإصرار العربي _أو إن شئنا الدقه وحتي لا تكون مصر في هذا الإطار سر الإسرار الخليجي _ علي محاربة مصر التي ضعف بل تلاشي دورها بأثر رجعي
وما هو السر الكامن وراء كل هذه المحاولات للترويج للثقافه الخليجيه البدويه الجلفه
القضيه بحق ليست تميم أو نوّاره أو دبي أو المسابقه ولكن المسابقه ومعها كل ما تم ذكره يدخل في دائرة القضيه وصلب موضوعها
تميم وقد تكون نوّاره معه يمثلان التروس التي تدور عليها الماكينه وليس معني هذا أنهما هم فقط كذلك ولكنهما النموذج الذي طالما يجد الكثير من المتطوعين للمسانده والمؤازره سواء بحسن نيه فقط كنوّاره أو في مقابل مليون درهم كتميم
وتجد في هذا الإطار أيضاً شخصيات مصريّه من المفترض أن لها ثقلها
وفي المسابقه تحديداّ هناك الدكتور صلاح فضل
الذي يتردد ان المقابل المادي الذي سيتقاضاه هو نفس قيمة جائزة المركز الأول وهي مليون درهم
هي مسألة تحدي كما أراها لا غير ومحاولة فرض هويه وثقافه طالما كانت تابعه لا متبوعه عبر آليات وطرق تنحصر جميعها في شراء الأتباع والمساندين
أي أنه فرض ثقافه ضعيفه وهشه بالمال والمعاونين
والموضوع لا ينحصر فقط في هذه المسابقه ولكن الجوانب المتنوعه لهذه الخطه المبيته كبيره ومتسعه
لم تبدأ مع صالح كامل والوليد إبن طلال عبر شرائهم لنيجاتيف أغلب أفلام وتراث السينما المصريه ثم إستغلاله بشكل سئ وفيما بعد سيأتي إهماله لصالح إنتاجهم الخاص والعينه أتت بالفعل عبر مجموعة أفلام منها عندليب الدقي فيلم هنيدي الأخير
الذي رغم أن الكاست بالكامل مصريين إلا انه تعمد أن يسوق الثقافه الخليجيه في الموضوع وعلي نطاق واسع
ولتري موذجاً حجم القنوات التي تذيع اغنيات خليجيه في مقابلة ما تذيع أغنيات مصريه رغم أن التراث الغنائي العربي أغلبه ينحصر الفضل فيه للمصريين
وكذلك لتحاول أن تحصي عدد الأغنيات التية تذاع لأم كلثوم والتي تذاع لمحمد عبده
القضيه كبيره
وأفرعها متنوعه ومتشعبه
ونحن نشارك فيها بسذاجه
المستهدف في الموضوع هي الثقافه المصريه حتي ولو حاولوا أن يلغوا تاريخاً طويلاً علي كل المستويات
لنجد عبد الباسط عبد الصمد كمقرئ يتلاشي لصالح مشاري بن راشد
أو قناة السديس التسي يجري لها الترويج قبل نزولها رغم أن الأزهر قد رد مصحفه أربع مرات لأخطاء في التلاوه
ثقافتنا هي الهدف
وأموالهم هي الطريق والبعير الموصل للهدف
لكن للأسف نحن كمصريين حداة هذا البعير
يالا
بيدي لا بيد زايد أو فهد أو الصباح
حسبي الله ونعم الوكيل

مثلي قوي بس مش مثلي قوي

في الأول خالص أنا زعلان ومتأثر وباعتذر علشان بقالي مدّه كنت غايب عن ساحة الصراع التدويني
بس فعلاً بجد الموضوع كان قهري لأن المدونه كانت مقفوله
ولسه مفتوحه حالاً
وآخر موضوع أنا كنت كتبته علي المدونه هو المدخل للموضوع إللي هاكتبه دلوقتي
الموضوع كان بعنوان إللي عايز يكفر يكفر وأنا أول واحد هاسانده
وكان بإختصار بيتكلم عن حدّ الردة الذي يسوقه بعض رجال الدين علي أنه حكم إلهي ثابت ولا نقاش فيه
وقد جاء لي كثي ر من التعليقات علي الموضوع سواء بالسلب أو بالإيجاب بالنقاش والحجه أو بالسب والإهانه
ولكن آخر هذه التعليقات ومدخل هذا الموضوع جاء من المدون
مثلي قوي
والذي إمتدح الموضوع وعقلي وتفكيري ثم ختم قائلاً لي إن كنت مع المثليين فتعال ومرحباً بك
وإن لم تكن فلا تأت أفضل لك
ولم يستفزني في هذا السياق لهجة الترهيب والترغيب
والختام التوعدي الذي يشي بأن من قاله أحد ضباط وزارة الداخليه او أنه آخر أحفاد خط الصعيد أو إبن ريا وسكينه بالتبني
ما علينا من التهديد هيا جت علي مدون متغاظ وطالع عينه زينا ما الداخليه مبهدلانا يومياً
المستفز في الموضوع أن الأخ الذي إمتدح عقلي وحكمتي وموضوعي ورأي أنهم قد وصلوا إلي مرحلة التفتح والوعي والحياد
قد تخلي عن هذا الحياد وأصدر قراراً جامعاً مانعاً قاطعاً مصادراً بأن اتبني موقف معين إن كنت أريد أن أشاركه الحوار
وبجانب هذا التناقض الواضح من الأخ المثلي فقد إتضح أنه لم يفهم أي مما قلته في سياق مقالتي الطويله
فأنا بالنسبه لي وبشكل شخصي مرجعيتي الأولي والأخيره في الحكم علي الأشياء العام فيها والخاص هو الإنسان
وليس الإنسان كتعبير مجرد مرفوع لأعلي عن جنس كامل
ولكن مرجعيتي هي الفرد
راحة الفرد وحرية الفرد ورفاهية الفرد
هي الأمور التي يبني عليها حكمي علي الأشياء
لا أتقيد بأحكام دينيه رغم تقديري وإحترامي لكل العقائد سماويه أو وضعيه
كما أنني لا أتقيد بدستور أو قانون او أعراف وعادات وتقاليد
الفرد عندي أولاً وأخيراً
يعتقد كيفما يشاء
ويأكل كيفما يشاء
ويشرب ويعيش ويؤمن ويكفر وينتخب ويرفض ويعارض ويتظاهر كيفما وأينما شاء
لكن الأخ المثلي الذي قرأ مقالي وإمتدحه حتي إعتقدت أنه مثلي في الوعي والتفكير إتضح لي من نهاية حواره أنه مثلي فقط لا مثلي
إعتقاده الول يبني علي الناحيه العضويه
إهتمام جسدي شبق
ليست المعضله في أن أنتزع حريه جسديه ترفضها الأديان السماويه والوضعيه _ رغم أنني أؤيد حقه في هذا _ وتستنكرها الأعراف البشريه والعادات المجتمعيه علي إمتداد الكره الأرضيه رغم أنها ليست محل إعتراف وتقدير كبيرين مني
ولكني أرفض هذا التوجه في التفكير ولتعاطي مع الأمور
مثلما فوجئنا بتيار في الأدب يري أن الجسد محور الحياه وأن كتابة الجسد مدخل مناسب لفهم البشر وعالمهم أو عوالمزهم المتناقضه التي تتركز علي إختلافها وتنوعها حول الجسد
وبدأت هذه الكتابات بأعمال جيده كانت تبشر بإمكانية أن يصبح هذا تيارأً أدبياً راسخاً بل وأن ينتزع الصداره
لكن الرؤيه
إتضحت حينما تحول هذا الشكل الكتابي إلي أداه جيده وجاهزه للتفصيل علي مقاس المصادره والجوائز الغربيه والشهره لا غير
لنري فيما بعد أناه تنويعه كتابيه علي أفلام البورنو التي تري فيها كل ما يخص العلاقه الإنسانيه الحميمه ماعدا المشاعر والفهم الدقيق للفعل ومبعثه
أنا لست ضد المثليين بل إني مكن منطلق إنساني أؤيد مطالبهم لكن المشكله ان تجد أن من يتعرض للقهر والمصادره والعنف يصر أن يمارس نفس هذه الأفعال مع الغير ولو عبر الحوار واللغه
هذا هو التناقض المستمر والمستفز الذي يجعلنا نخسر الأرضيه القابله للبناء عليها ونخسر حلفاء إستراتيجيين ومهمين
آخر حلقات الإستفزاز هي الدعوه التي وجهها لي الأخ المثلي في نهاية كلامها مرحباً بالإنضمام لهم إن كنت معهم ومحذر اً إن لم أكن معهم
ولا أفهم ما معني هذه الدعوه
هل هي دعوه للمسانده أم دعوه للمشاركه
أنا أساند أي إنسان في فعل أي شئ يريده دونما دعوه
لكن ليس من المفترض أن أكون مطالباً بأن أشاركه هذا الفعل
وعذراً يا أخ مثلي
أنا لست مثلي
وانت لست مثلي